ՀՀ մանրածախ առեւտրաշրջանառության ոլորտում 2016-ին արդեն նկատվում է կայունություն: Այս մասին, այսօր՝ հունիսի 29-ին, լրագրողների հետ զրույցում նշել է ՀՀ փոխվարչապետ Վաչե Գաբրիելյանը:
Նրա խոսքով, նույն ֆենոմենը, որ առկա էր 2015 թվականին, երբ մենք ունեինք տնտեսական աճ՝ սպառման անկման պայմաններում, առկա է նաեւ ԵՏՄ-ում: «Դա բացատրվում է տարածաշրջանային, ինչպես նաեւ համաշխարհային շուկայի կառուցվածքային գործոններով: Մասնավրոապես նավթի գների փոփոխություններով, փոխարժեքի անկմամբ եւ մնացած գործոններով պայմանավորված, սպառման մակարդակը բոլոր երկրներում ունի շոկ եւ այդ շոկը տարիների ընթացքում է միայն մարում, որովհետեւ դա բավական լուրջ է: Բնականաբար, երբ դուք ունեք սպառման նվազում, դա որոշակիորեն անդրադարձել է ընդհանուր տնտեսական սպառման վրա, սակայն արդեն առկա են կայունացման միտումներ»,-ասել է նա:
Գաբրիելյանը նշել է, որ եթե 2016-ի սկզբին մանրածախ առեւտրաշրջանառության ոլորտում ունեինք անկում՝ շուրջ 97 տոկոս նախորդ տարվա համեմատ, ապա այս պահին 5 ամսվա կտրվածքով այդ ցուցանիշը 99,9 տոկոս է: «Դա արդյունք է նրա, որ արդեն առաջիկա ամիսներին մանրածախ առեւտրաշրջանառությունում սպառումը անցած տարվա համեմատ վերականգնման միտում ունի եւ 2016-ի մայիսին նախորդ տարվա նկատմամբ 101 տոկոս էր: Դա նշանակում է, որ մենք կամաց-կամաց կարգավորվում ենք եւ արդեն այդ տատանումների չափը սկսում է նվազել»,-ընդգծել է փոխվարչապետը: