Քաղցրաշենի ինքնահոս ոռոգման համակարգի նոր նախագծով նույնպես լուրջ բնապահպանական խնդիրներ են առաջանում «Եթե այդ հատվածից են ջուրը տանում, կրկին բնապահպանական լուրջ խնդիրներ են առաջանում: Նախ ջրի քանակն է քիչ, եթե այդ ծավալի ջուրը հազիվ բավարարում է մեր հողատարածքները ոռոգելու համար, նորից լրացուցիչ բեռնում են, փաստորեն բնապահպանական լուրջ վնաս են հասցնում: Եթե էդ ծավալի ջրով ենթադրենք 1000 հա կարելի է ջրել, նրանք զոռով ուզում են, որ 2000 հա ջրեն, բայց այդպես չի կարելի, դա սխալ է: Ծավալը չի բավարարում, բնապահպանական թոփքը չի բավարարում, պլյուս այնտեղ կենդանիներ կան, որոնք գրանցված են «Կարմիր գրքում», հատկապես բեզոարյան այծը, որ հենց այդ մասերում է ապրում: Այս կենդանիները տեղեր չեն գնում, գետի այդ հատվածի ջրից են օգտվում: Եթե գետի ջուրը պակասի, այդ կենդանիներն էլ խումբ-խումբ կվերջանան»,-NEWS.am-ի հետ զրույցում այսօր՝ հուլիսի 1-ին, ասաց Կոտայքի մարզի Գառնի համայնքի բնակիչ Արուսյակ Այվազյանը՝ նշելով, որ գառնեցիները մասնագետների հետ խորհրդակցելուց հետո անպայման քայլեր կձեռնարկեն, որպեսզի այդ ծրագիրը չիրականանա:
Նշենք, որ փոխզիջումային տարբերակի համաձայն՝ նախատեսվում է Քաղցրաշենի ինքնահոս համակարգի ջրառի նախատեսված գլխամասային հանգույցը տեղափոխել Ազատ գետի հունով 5.2 կմ ներքեւ` ներկայումս գործող Գեղադիր-Հացավան պոմպակայանի տարածք: Այս մոտեցումը հնարավորություն կտա խուսափել կիրճի՝ որպես հանգստյան գոտի ներկայացվող տարածքներում շինարարական աշխատանքներ իրականացնելուց, ինչպես նաեւ՝ հեռացնել ջրառի կետը բնության հուշարձաններից` բացառելով կիրճի գրեթե բոլոր հողատերերի առնչությունը ծրագրին: Նախագծի համաձայն՝ գետում նոր ջրառի հանգույց չի կառուցվի, այլ կօգտագործվեն գոյություն ունեցող պոմպակայանի ենթակառուցվածքները` Ազատ գետից ջրառ իրականացնող առկա գլխամասային հանգույցը, ինչպես նաեւ՝ պահպանվող տարածքում առկա շենք-շինությունները, ճանապարհները, էլ. սնուցման գծերը եւ ենթակայնները:
Գառնեցիներն արդեն 2 տարի պայքարում են Կառավարության որոշումը չեղյալ համարելու համար, որով նախատեսվում է Ազատ գետի ջուրը Գառնիի հեթանոսական տաճարի տակից վերցնել խողովակներով տեղափոխել Արտաշատի 12 գյուղեր:
