Հունվար-մայիսին մանրածախ ապրանքաշրջանառության ծավալներն ընթացիկ գներում տարեկան կտրվածքով կրճատվել են 37.8 մլրդ դրամով կամ 7.9%-ով: Ընդ որում, ընթացիկ տարվա ամիսների դինամիկան հուսադրող չէ: Հունվարին անկումը կազմել է 6.5 մլրդ դրամ, մայիսին՝ 7.9 մլրդ դրամ:

Հաշվի առնենք, որ հաշվարկային բազայում, այսինքն՝ անցյալ տարվա հունվար-մայիսին, այս բացասական միտումներն արդեն նկատվում էին: Այսպես, նախորդ տարվա նույն ժամանակահատվածի համեմատ՝ ընթացիկ գներում մանրածախ ապրանքաշրջանառության ծավալների անկումը կազմել է 14.3 մլրդ դրամ կամ շուրջ 3%: Ստացվում է, որ ընթացիկ տարում հետընթացն ուժեղացել է:

Հայաստանի Կենտրոնական բանկի տվյալներով, ֆիզիկական անձանց դրամական փոխանցումները հունվար-ապրիլին տարեկան կտրվածքով կրճատվել են 2.5%-ով: Սա՝ դոլարով: Իսկ եթե գումարը վերածենք դրամի, ապա անկման մեծությունը հասնում է 0.4%-ի: Բացարձակ արտահայտությամբ փոխանցումների գումարը մեկ տարվա ընթացքում կրճատվվել է շուրջ 0.8 մլրդ դրամով: Կարելի է ենթադրել, որ մայիսին այս առումով զգալի տեղաշարժ չի արձանագրվել: Ստացվում է, որ մեկ տարվա ընթացքում դրամական փոխանցումների մասով մեր քաղաքացիների եկամուտներն աննշան են նվազել:

Սակայն պատկերը կտրուկ փոխվում է, երբ դիտարկում ենք փոխանցումների սալդոյի դինամիկան: Մաքուր ներհոսքը (այսինքն՝ «ներհոսք»՝ հանած «արտահոսք») հունվար-ապրիլին կրճատվել է 32.2 մլն դոլարով կամ գրեթե 20%-ով: Սակայն վարկածը, որ արտերկրից դրամական օգնություն ստացողներն արժույթի մի մասը հետ է ուղարկում, կասկածելի է: Ամենայն հավանականությամբ, փոխանցումների մի մասի հետադարձ փոխանցումը կոմերցիոն նպատակներ է հետապնդում: Այդ պատճառով հարց է առաջանում. մանրածախ ապրանքաշրջանառությունում անկումը որքանով է կապված դրամական փոխանցումներում մաքուր սալդոյի նվազման հետ:

Դատելով պաշտոնական տվյալներից՝ բնակչության վճարողունակությունն աշխատավարձի մասով աճել է: Այսպես. հունվար-մայիսին միջին ամսական անվանական աշխատավարձը, 1.6%-ի սղաճի ֆոնին, 3.5%-ով աճել է: Արդյունքում իրական աշխատավարձն ավելացել է 5.2%-ով: Ապրիլի տվյալներով, մշտական բնակչության թիվը տարեկան կտրվածքով կրճատվել է «ընդամենը» 0.5%-ով: Պարզ չէ, թե այս տեղեկությունն ինչպես կարելի է կապել առեւտրում լայնածավալ հետընթացի հետ:

Մանրածախ առեւտրաշրջանառության ծավալները կրճատվել են առանց բացառության բոլոր տեսակի առեւտրային օբյեկտներում: Սակայն ամենամեծ անկումը՝ ինչպես բացարձակ արտահայտությամբ (28.2 մլրդ դրամ), այնպես էլ տոկոսային (31.8%), գրանցվել է, այսպես կոչված, «առեւտրի այլ օբյեկտների» մասով: Նկատենք, որ վերջինների ուղղվածությունը շարժիչի վառելիք վաճառելն է:

Սմբատ Գրիգորյան