Արմավիրի մարզի Նորապատ գյուղում հուլիսի 1-ի կեսօրին մեքենաներ են այրվել:

ԱԻՆ լրատվական ծառայությունից NEWS.am-ը տեղեկանում է, որ ժամը 15.38-ին ահազանգ է ստացվել, որ Արմավիրի մարզի Նորապատ գյուղի 5-րդ փողոցում տեղի է ունեցել ավտովթար:

Պարզվել է, որ «ԶԻԼ» մակնիշի 34 FQ 007 պետհամարանիշի ավտոմեքենան ընթացքի ժամանակ հրդեհվել է, այնուհետեւ վարորդը՝ Խ. Խ.-ն, փորձել է կայանել մեքենան «ՎԱԶ-2106» 34 AM 178 համարանիշի (վարորդ՝ Է. Բ.) մակնիշի ավտոմեքենայի կողքին, ինչի հետեւանքով վերջինս նույնպես հրդեհվել է:

Մինչ փրկարարների կանչի վայր հասնելը «ԶԻԼ» մակնիշի ավտոմեքենայի վարորդը եւ ուղեւորներ Խ. Խ., Խ. Ա. եւ Ու. Կ.-ն տեղափոխվել են Արմավիր քաղաքի ԲԿ:

Բժիշկները տուժածների առողջական վիճակը գնահատել են բավարար:

Մինչ հրշեջ-փրկարարների կանչի վայր հասնելը հրդեհը մարվել է տեղի ուժերով: Ամբողջությամբ այրվել են «ԶԻԼ» եւ «ՎԱԶ-2106» մակնիշի ավտոմեքենաները: