Այսօր՝ հուլիսի 2-ին, տեղի է ունեցել «Հայազն» կուսակցության 3-րդ համագումարը, որի ժամանակ նշվել է, որ կուսակցությունը պատրաստվում են մասնակցել 2017թ-ի խորհրդարանական ընտրություններին։ Համագումարի ընթացքում հրապարակվեց նաեւ կուսակցության կողմից ընդունած Հռչակագիրը, որում մասնավորապես ասված է.
«Վերահաստատելով մեր սկզբունքային եւ հիմնավորված համոզմունքը, որ Հայաստանի, այսպես կոչված, Երրորդ Հանրապետությունը գործուն, արդյունավետ, արդար եւ անվտանգ Ազգային պետությանը հարիր պետական ձեւ չէ եւ ենթակա է պարտադիր հեղափոխական փոփոխության։ Մենք գիտակցում ենք, որ այդ փոփոխությունը հնարավոր է միայն, որպես առաջին քայլ տվյալ վարչախմբի անվերապահ ամբողջական հեռացումից հետո։
Չվստահելով երկրում գործող այլասերված ընտրական համակարգին, ինչպես նաեւ թերահավատորեն վերաբերվելով Հայաստանում, այսպես կոչված «լիբերալ դեմոկրատիայի» ըստ էության կիրարկելիության եւ արդյունավետությանը, մենք եւս մենք անգամ հաստատում ենք , որ ազգային-ազատագրական գաղափարախոսությունը լայնորեն քարոզելու, մեր շարքերը ընդլայնելու եւ ամրապնդելու նպատակով մասնակցելու ենք Ազգային ժողովի ընտրություններին»։
Կուսակցության նախընտրական դրույթներում ներառված են հետեւյալ հարցերը` ՀՀ ինքնիշխանության վերականգնում, ՀՀ եւ Արցախի ողջ տարածքում մեկ եւ միացյալ պետականության հաստատման խոչընդոտների վերացում, օլիգարխիայի վերացում, ՀՀԿ-ի եւ մասնավոր մենաշնորհների արգելում, ընդերքի ազգայնացում, քաղաքացիների ազատությունների եւ պարտականությունների հավասարեցում, օբյեկտիվ դատական համակարգի հաստատում, քաղբանտարկյալների անհապաղ ազատում ու նյութական փոխհատուցում եւ այլն:
Համագումարի ընթացքում նաեւ հայտարարվեց, որ «Հայազնը» պատրաստվում է ազգային հեղափոխություն իրականացնել:
