![](img/news/33/60/26/default.jpg)
Ռուսաստանի ու Թուրքիայի հարաբերությունների կարգավորումը օրակարգից չի հանում այդ երկրում գտնվող ահաբեկիչներին արտահանձնելու անհրաժեշտության հարցը: Այդ մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է «ՌԻԱ նովոստին»:
«Ինչ վերաբերում է Թուրքիային, ուզում եմ ասել՝ հարաբերությունների կարգավորումը օրակարգից չի հանում այն խնդրահարույց հարցերը, որոնք կային մինչ այդ: Եվ եթե ահաբեկիչները, որոնց մենք որոնում ենք, գտնվում են Թուրքիայի տարածքում, ինչպես եւ ցանկացած այլ երկրի տարածքում, մենք նրանց կշարունակենք նույնկերպ հետապնդել ու պահանջել նրանց արտահանձնումը: Չէի ցանկանա, որ որեւէ պատրանքային տպավորություն ստեղծվեր, որ հիմա մենք խնդրահարույց հարցերը գորգի տակ ենք խցկելու, ոչ մի նման բան»- ասել է Զախարովան:
Նա նաեւ նկատել է, որ կճշգրտի տեղեկությունները ձերբակալված 11 ռուսաստանցիների մասին, որոնց կասկածում են Թուրքիայում վերջերս կայացած ահաբեկչություններին մասնակցություն ունենալու համար:
«Ինչ վերաբերում է մնացած անձերին, որոնք այդ հարցում մասնակցություն ունեն, մենք հետեւում ենք իրավիճակին, ես կարող եմ ճշգրտել մեր իրավապահ մարմիններից, համապատասխան ծառայություններից, թե մենք ինչ տվյալներ ունենք նրանց վերաբերյալ»,- հավելել է ԱԳՆ ներկայացուցիչը: