Հարավային Սուդանում հայերի մասնակցությամբ անցած տարվա նոյեմբերին տեղի ունեցած ավիավթարի մանրամասները դեռեւս հայտնի չեն:

NEWS.am-ի թղթակցին զոհված օդաչուների հարազատները հայտնեցին, որ ոչինչ չեն կարողանում ճշտել:

«Նույնիսկ արտգործնախարարությունից մեզ ոչինչ չեն հայտնում: Առ այսօր չգիտենք, թե իրականում ինչ է տեղի ունեցել Հարավային Սուդանում, ինչու են մեր հարազատները մահացել»,- ասացին հարազատները:

Նշենք, որ պաշտոնապես չի հաստատվել նույնիսկ, թե որ ավիաընկերությանը պատկանող օդանավն է վթարվել: Ըստ տարածված տեղեկությունների՝ օդանավը պատկանել է Գառնիկ Պապիկյանի Ala International LTD ընկերությանը, որը գրանցված է Շարժայում:

Ավելի վաղ հայտնի էր դարձել, որ 2015թ. նոյեմբերի 4-ին բեռնատար ԱՆ-12 օդանավի վթարից զոհվել են տասնյակ մարդիկ՝ օդանավի անձնակազմը, ուղեւորները, երկրի վրա գտնվող մարդիկ։

Օդանավի անձնակազմի հինգ անդամները հայեր են եղել

Առաջին օդաչու, օդանավի հրամանատար Գեւորգ Թովմասյանը

Երկրորդ օդաչու Սամվել Համբարձումյանը

Ինժեներ Սամվել Մկրտչյանը

Ավիատեխնիկ Արմեն Անտոնյանը

Ավիատեխնիկ Սուրեն Պետրոսյանը

Անձնակազմի մարմինները տեղափոխվել են Հայաստան: