Հուլիսի 23-ին Իսպանիայում զենքի առեւտրով զբաղվող միջազգային կազմակերպության ապօրինի գործունեության կանխմանն ուղղված գործողության ընթացքում ինը մարդ է ձերբակալվել:
Գործողությունը իրականացվել է Իբիցա կղզում: Ոստիկանության տվյալներով զենքը մատակարարվում էր Գերմանիայում, Շվեյցարիայում, Բելգիայում, Ֆրանսիայում ու Մեծ Բրիտանիայում գրանցված ֆիրմաների միջոցով, որոնց կենտրոնական գրասենյակները օֆշորային գոտիներում են, հայտնում է «ՌԻԱ Նովոստին»:
Խմբավորման պարագլուխը մեծ կապեր ուներ աշխարհով մեկ: Գամբիայում զենքի մատակարարման մասին բանակցություններ վարելու համար նա Լեհաստանից ժամանել էր այդ երկրի նախագահի անձնական օդանավով: Միայն Հարավային Սուդան նրա լեհաստանյան ֆիրմայի միջոցով մատակարարվել է «ԱԿ 47» տեսակի 200 հազար ինքնաձիգ, ականանետ ու նույնիսկ տանկ:
Հետաքննությունը սկսվել է դեռ 2012-ին, երբ ոստիկանությունը հետաքրքրվել է այն մարդով, որը Իբիցայում շքեղ կյանք էր վարում, առանձնատուն ուներ, բազմաթիվ թանկարժեք ավտոմեքենաներ, դիվանագիտական անձնագիր, ընդ որում թաքցնում էր իր փողերի ծագումը: Տղամարդը մշտապես թիկնապահների հետ էր, իսկ առանձնատունը, որտեղ պաշտպանության բարդ համակարգ էր տեղադրել, անմատչելի ամրոցի էր վերածել:
Այդ մարդը ներկայացել էր որպես դիվանագետ, նա ուներ Գվինեա Բիսաուի անձնագիր, որը պարզվեց՝ անվավեր էր: Նա նաեւ իր տան վրա փակցրել էր ցուցանակ, որից հետեւում էր, որ դա հյուպատոսարանի տարածք է: Նա ներկայանում էր որպես Գվինեա Բիսաուի վարչապետի տնտեսական հարցերով խորհրդական: Հետաքննության ընթացքում պարզվել է, որ տղամարդը նախկին լեհ զինվորական է, միլիոնատեր:
