Աֆղանստանի նախագահ Աշրաֆ Գանին հուլիսի 24-ը հայտարարել է համազգային սգո օր ՝ երկրի մայրաքաղաք Քաբուլում կատարված ահաբեկչության 80 զոհերի հիշատակին, հայտնում է «ՌԻԱ Նովոստին»
«Մեր թշնամիները թիրախավորելով քաղաքացիական ազատությունները, կարծում են, թե կարող են պառակտել մեզ: Բայց նրանք կպարտվեն»,- հայտարարել է Գանին իր հեռուստատեսային ելույթի ժամանակ, որից մի հատված է մեջբերել TOLO News հեռուստաալիքը:
«Ես հատուկ հանձնաժողովին ու գլխավոր դատախազությանը հանձնարարել եմ հետաքննել միջադեպը ու գտնել պատասխանատուներին»,- հավելել է նա:
Ինչպես հայտնել է երկրի ՆԳՆ-ն, Քաբուլում զանգվածային հանրահավաքի ժամանակ պայթյունը կազմակերպել էին երեք մահապարտ ահաբեկիչներ: Առաջին չարագործին հաջողվել է գործի դնել պայթուցիկ սարքը, երկրորդի պայթուցիկը չի աշխատել, իսկ երրորդին ոչնչացրել են երկրի անվտանգության ուժերը: Զոհերի ու տուժածների շրջանում կան անվտանգության ու պաշտպանության ուժերի ներկայացուցիչներ, որոնք ապահովում էին բողոքի ակցիայի մասնակիցների անվտանգությունը, զոհվածներից մեկն էլ լրագրող է:
