Լեհաստանը կարծում է, որ Գերմանիայի իշխանություներն ու անվտանգության ապահովման համար պատասխանատուները պետք է բացատրեն, թե ինչու այդ երկրում գործը հասավ միգրանտների կողմից ահաբեկչությունների եւ հարձակումների: ՏԱՍՍ-ի փոխանցմամբ՝ այս մասին հայտարարել է Լեհաստանի ԱԳ նախարար Վիտոլդ Վաշչիկովսկին:
«Մեզ վստահեցնում էին, որ մեծ թվով միգրանտների տեղակայումը, Եվրոպայի դռների բացումը որեւէ խնդրի չի հանգեցնի: Պարզվում է՝ խնդիրներ կան»,- նշել է լեհ պաշտոնյան:
Վաշչիկովսկին խոստովանել է, որ որոշ միջադեպեր ուղղակիորեն կապ չունեն դեպի Եվրոպա փախստականների վերջին հոսքի հետ, բայց մի շարք դեպքերի ուղղակիորեն մասնակցել են մարդիկ, որոնք Եվրոպայում են հայտնվել միգրացիոն այդ ալիքի հետ:
«Եվրոպացի քաղաքական գործիչների, գերմանական գործիչների եւ հատուկ ծառայությունների վստահեցումները, թե Եվրոպան անվտանգության մեջ է, անհիմն են»,- փաստել է Լեհաստանի ԱԳ նախարարը: Նրա խոսքով՝ Վարշավան արեւմտյան գործընկերներից այնպիսի գործողություններ է ակնկալում, որոնք Եվրոպան կպաշտպանեն նոր հարձակումներից:
