ՊՊԾ գնդի տարածքից կրծքավանդակային հրազենային վնասվածքով այսօր՝ հուլիսի 31-ին «Էրեբունի» բժշկական կենտրոն տեղափոխված «Սասնա ծռեր» խմբի անդամ Սեդրակ (Սեթո) Նազարյանի վիրահատությունը նորմալ է անցել, նա այժմ գտնվում է վերակենդանացման բաժանմունքում։
Այս մասին NEWS.am-ին հայտնեցին Առողջապահության նախարարությունից, հավելելով, որ Սեդրակ Նազարյանի վիճակը գնահատում են կայուն ծանր, միացվել է արհեստական շնչառական սարք։ Գիտակցությունը տեղն է։
«Էրեբունի» ԲԿ տնօրեն Միքայել Մանուկյանը լրագրողների հետ զրույցում նշեց, որ Սեդրակ Նազարյանը իրենց մոտ է տեղափոխվել այսօր առավոտյան ժամը 09.30-ի սահմաններում, կրծքավանդակի աջ կեսի հրազենային վնասվածքով. «Կատարվել է վիրահատություն, դեռեւս միացված է արհեստական շնչառության ապարատին»։
Հարցին, թե արդյոք կյանքին վտանգ սպառնում է, Միքայել Մանուկյանը պատասխանեց. «Քանի որ հիվանդները գտնվում են վերակենդանացման բաժանմունքում, ինչ-որ տոկոս կա, որ կյանքին վտանգ է սպառնում, բայց կարծում եմ՝ մեզ կհաջողվի փրկել Նազարյանին»։
Ինչ վերաբերում է նրան, թե արդյոք Նազարյանը այս պայմաններում կարող է տեղափոխվել «Դատապարտյալների հիվանդանոց» ԲԿ տնօերնն ասաց. «Այս պահին, կարծում եմ՝ ոչ։ Դեռ շուտ է ասել, թե քանի որից դա հնրավոր կլինի, քանի որ նոր հետվիրահատական շրջանն է, դեռ կմնա մեզ մոտ»։
Նշենք, որ հուլիսի 29-ին Խորենացի փողոցում և Սարի թաղում տեղի ունեցած միջադեպի հետևանքով «Սուրբ Գրիգոր Լուսավորիչ» բժշկական կենտրոն դիմածներից ևս երեքը դուրս է գրվել։ Այս պահի դրությամբ հիվանդանոցային բուժումը շարունակում է 22-ը։
