Թուրքիայի ընդդիմադիր «Ժողովրդա–հանրապետական» կուսակցության առաջնորդ Քեմալ Քըլըչդարօղլուի ավտոշարասյան դեմ իրականացված հարձակման հետ կապված PKK–ն (Քուրդիստանի բանվորական կուսակցություն) հայտարարություն է տարածել։

Թուրքական Diken–ի փոխանցմամբ՝ PKK–ի պատասխանատուներից մեկը հայտնել է, թե իրենք տեղյակ չեն եղել, որ զինվորական շարասյան հետեւից անցնելիս է եղել CHP–ի առաջնորդ Քեմալ Քըլըչդարօղլուն։

«Մեր ուժերը նկատել են զինվորական մեքենա եւ դիպուկ հարվածել են։ Սակայն մենք տեղեկություն չենք ունեցել, որ զինվորականներն ուղեկցում են Քեմալ Քըլըչդարօղլուին, ավելին մենք Քըլըչդարօղլուին վնասելու մտադրություն չունենք։ Մեր թիրախը Թուրքիայի անվտանգության ուժերն են»,–ասել է PKK–ի ներկայացուցիչը։

Նշենք, որ օգոստոսի 25–ի կեսօրին Արտվին նահանգում Քեմալ Քըլըչդարօղլուի ավտոշարասյունն ուղեկցող զինվորական մեքենան ենթարկվել է գնդակոծության, որի հետեւանքով սպանվել է 1 եւ վիրավորվել՝ 2 զինվորական։