Գործարար Արամ Պետրոսյանը, որը մարդկանց էր պատանդառել Մոսկվայում «Սիթիբանկի» մասնաճյուղում, դադարեցրել է հացադուլը, այս մասին «ՌԻԱ Նովոստիին» հայտնել է նրա փաստաբան Ստանիսլավ Մալցեւը:
Մինչ այդ լրատվամիջոցները հայտնել էին, որ Պետրոսյանը հացադուլ է հայտարարել:
«Բժիշկները նրան խորհուրդ են տվել դադարեցնել հացադուլը, ու մենք, որպես փաստաբաններ, նրան խորհուրդ ենք տվել չվտանգել առողջությունը»,- ասել է փաստաբանը:
Նա պարզաբանել է, որ կալանքի մասին որոշման հրապարակումից հետո Պետրոսյանի ինքնազգացողությունը վատացել է ու շտապ օգնություն են կանչել դատարան: Մալցեւը նաեւ նշել է, որ առայժմ ոչ մի քննչական գործողություն իր պաշտպանյալի նկատմամբ չի իրականացվում:
«Այս շաբաթ կստուգեն նրա ցուցմունքները տեղում՝ այսինքն բանկի մասնաշենքում»- ասել է փաստաբանը:
Գործարար Արամ Պետրոսյանը չորեքշաբթի երեկոյան չորս մարդու էր պատանդառել Մոսկվայի կենտրոնում գտնվող «Սիթիբանկի» մասնաճյուղում, սպառնալով պայթեցնել շենքը: Սակայն հետո տղամարդը մեկ-մեկ ազատ է արձակել բոլոր պատանդներին ու հանձնվել իրավապահներին: Առարկան, որը նա ներկայացնում էր իբրեւ ռումբ, պարզվել է, որ մուլյաժ է: Պետրոսյանը հարցաքննության ժամանակ ասել է, որ իր արարքով ուզում էր ուշադրություն գրավել իր սնանկացման խնդրին:
