Խանութների կեսից ավելին ավելի քիչ տուրքեր է վճարելու: Այս մասին սեպտեմբերի 26-ին ԱԺ արտահերթ նիստի ժամանակ հայտնել է Երեւանի փոխքաղաքապետ Կամո Արեյանը՝ ներկայացնելով «Տեղական տուրքերի ու վճարների մասին» օրենքում փոփոխությունների նախագիծը:
Նրա խոսքով օրինագիծը առաջարկում է ռեստորաններից ու խանութներից գանձվող տուրքերը որոշել ըստ դրանց զբաղեցրած մակերեսի: Այսպիսով փոքրերը ավելի քիչ կվճարեն, խոշորները՝ ավելի շատ, բայց առեւտրի վրա ընդհանուր ֆիսկալ ծանրաբեռնվածությունը չի աճի: Արեյանը նշել է, որ առեւտրի գերփոքր սուբյեկտների 52 տոկոսը Երեւանում է գործում: Ընդհանուր առմամբ եռամսյակում ծխախոտային արտադրանքի առեւտրից գանձվող տուրքը կազմում է 36.7 մլն դրամ,իսկ հիմա կկազմի ընդամենը 39 մլն, ոգելից խմիչքի դեպքում՝ 44.5 –ից 48.3 մլն-ի կաճի: «Ինչպես տեսնում եք, մենք նպատակ չունենք բարձրացնել քաղաքային բյուջեի շահույթը: Մենք պարզապես վերաբաշխում ենք ծանրաբեռնվածությունը՝ հօգուտ փոքր բիզնեսի»,- նշել է Կամո Արեյանը՝ վստահեցնելով, որ վճարների նվազեցումը կանդրադառնա առեւտրի սուբյեկտների 50-65 տոկոսի վրա:
