Ադրբեջանում սահմանադրական բարեփոխումների վերաբերյալ հանրաքվեն ավարտվել է այնպես, ինչպես եւ պետք էր ակնկալել այդ արեւելյան միապետությունում:
Ադրբեջանական լրատվամիջոցների փոխանցմամբ, ըստ ԿԸՀ նախագահ Մազախիր Պանախովի, նախնական տվյալներով ընտրողների 91.2 տոկոսը քվեարկել է նախագահական պաշտոնավարման ժամկետը երկրում 5-ից 7 տարի դարձնելու օգտին: Առաջին փոխնախագահ ու փոխնախագահների ինստիտուտներ ներդնելու օգտին է քվեարկել 89.3 տոկոսը: Նախագահի թեկնածուների համար տարիքային սահմանափակումը վերացնելու օգտին՝ 91.0 տոկոսը: Միլի Մեջլիսի պատգամավորների թեկնածուների համար տարիքային սահմանափակումը վերացնելու օգտին՝ 88.3 տոկոսը:
Հիշեցնենք, որ հանրաքվեի նախաձեռնողը Ադրբեջանի նախագահ Իլհամ Ալիեւն է եղել: Հանրաքվեին քվեարկության է դրվել Սահմանադրության մեջ երեք տասնյակ փոփոխություն, այդ թվում փոխնախագահների ինստիտուտի ստեղծում, որոնց անձամբ նախագահն է նշանակում, նախագահի ու պատգամավորների համար տարիքային ցենզի վերացում: Այսպիսով Իլհամ Ալիեւը ձգտում է օրինական հիմքեր ստեղծել իշխանությունը ժառանգաբար փոխանցելու համար: Ադրբեջանական ընդդիմությունն արդեն հայտնել է քվեարկության ընթացքում բազմաթիվ խախտումների մասին:
