ՀՀՇ վարչության նախագահ Արամ Մանուկյանը Պոտսդամում Ադրբեջանի «Մուսավաթ», Վրաստանի Հանրապետական կուսակցությունների հետ հռչակագրի ստորագրումից հետո հրաշալի պատկերացնում էր, որ իրենց հասցեին մեղադրանքներ են հնչելու: Այդ մասին հոկտեմբերի 18-ին հայտարարել է ինքը՝ Արամ Մանուկյանը՝ պատասխանելով NEWS.am-ի թղթակցի այն դիտարկմանը, թե Պոտսդամի հռչակագրից հետո Հայաստանում մեղադրանքներ հնչեցին Հայոց համազգային շարժման դեմ, թե համագործակցում է «Մուսավաթ» կուսակցության հետ, իսկ «Մուսավաթին» Ադրբեջանում մեղադրում էին Ղարաբաղը զավթած ՀՀՇ-ի հետ համագործակցելու համար:
«Ես գիտեի, որ այդպես էլ լինելու էր: Դա ինձ չի հետաքրքրում: Կովկասում պետք է արժանապատիվ, սեղանի շուրջ որոշումների շնորհիվ խաղաղություն լինի: Նույնն էլ Թուրքիայի հետ: Էդ որ իրենք (իշխանությունները- NEWS.am) Թուրքիայի հետ սկսել էին սիլիբիլի անել, դոլմա ուտել, ո՞վ էր իրենց բան ասում»,- նկատեց Արամ Մանուկյանը եւ հավելեց, որ «թշնամու հետ պետք է նստել սեղանի շուրջ եւ արժանապատիվ խաղաղություն կնքել»:
«Ես կողմնակից եմ բոլոր տեսակի բանակցությունների, շփումների, որոնք տարածաշրջանին խաղաղություն կբերեն: Բնականաբար, Ադրբեջանում էլ կան այդպիսի ուժեր, որոնց մեծ մասը քաղաքբանտարկյալներ են, տղերք, որոնք բանտերում նստել են, որոնք, ընդ որում, ղարաբաղյան պատերազմի ժամանակ խրամատի մյուս կողմում էին: Այսինքն, իրենց երկրների համար կռված մարդիկ գտնում են, որ իրենց երկրների համար հասել է խաղաղության պահը»,- նշեց Մանուկյանը:
Նա միաժամանակ բացառեց, որ հռչակագրում հակահայկական որեւէ ձեւակերպում է եղել: «Դուք մի հատ արժանապատվությունը նվաստացնող, խեղճացնող դրույթ տեսե՞լ եք այդ հռչակագրում: Ովքեր դեմ են խոսում հռչակագրին, ինչ ասեմ, «նիժե պլինտուսա» մակարդակի վրա են»,- արձանագրեց ՀՀՇ վարչության նախագահը: Ըստ նրա հռչակագիրը մաքուր քաղաքական, հռչակագրային փաստաթուղթ է, որտեղ ամրագրված են սկզբունքները:
Նշենք, որ նախորդ շաբաթ Պոտսդամում հարավկովկասյան երկրների երեք լիբերալ կուսակցությունները հռչակագիր էին ստորագրել, որում ամրագրել էին հակամարտությունների խաղաղ կարգավորման անհրաժեշտությունը, նաեւ կոչ էին անում երեք պետությունների իշխանություններից ազատ արձակել քաղբանտարկյալներին:
