Հայոց համազգային շարժում կուսակցությունն անելու է հնարավորը Հայաստանում քաղբանտարկյալների ազատ արձակման համար: Այդ մասին հոկտեմբերի 18-ին լրագրողների հետ հանդիպմանն ասել է ՀՀՇ վարչության նախագահ Արամ Մանուկյանը: Վերջինս ներկայացրել է կուսակցության վերջին ամիսների գործունեությունը եւ եվրոպական կառույցների արձագանքները` Հայաստանում քաղբանտարկյալների խնդրին:
Հարցին, թե ի՞նչ ազդեցություն կունենան այդ կոչերը Հայաստանի իշխանությունների վրա, Արամ Մանուկյանը պատասխանել է. «Ամբողջ աշխարհը, միջազգային կառույցները գիտեն, որ Հայաստանում անմեղ գործիչներ են ձերբակալված: Մենք մեր կողմից անելու ենք հնարավորը, ներգրավելու ենք մեր բոլոր կապերը քաղբանտարկյալների ազատ արձակմանը հասնելու համար»:
Ըստ Մանուկյանի՝ Հայաստանի իշխանությունների գործողություններում որեւէ տրամաբանություն չկա: «Իրենց մոտ խավարասերի մտածողություն է: Հաստագլուխ, հաստավիզ, որեւէ տրամաբանությունից զուրկ իշխանություն ունենք»,- ասել է ՀՀՇ վարչության նախագահը՝ նկատելով, որ չի կարող ասել, թե որքանով այդ կոչերը լսելի կլինեն Հայաստանի ապօրինի իշխանությունների համար:
