Հայ ասպիրանտները ստեղծել են սարք, որը ստուգում է 5G կապի որակը։
Սարքը թույլ է տալիս փորձարկել հաղորդիչում ազդանշանի թվային մշակման զանազան տեսակներ (մոդուլյացիաներ), իսկ փորձարկումների արդյունքներով էլ հասկանալ, թե որ մոդուլյացիան է նախընտրելի գործածել կապի համար։
Նոր գերարագ կապի համար ստանդարտ դեռ չի ընդունվել, բայց այն արդեն հիմա է պետք փորձարկել՝ հենց կողմնորոշվելու համար, թե ինչպիսին պետք է այն լինի։
«Սարքն ինքը 5G ցանցերում չի կիրառվելու, բայց դրա օգնությամբ կարելի է այդ ցանցում սարքերի համար բնութագրեր կազմել։ Այսինքն դրանց համար սահմանել պահանջներ, թե ինչպես պետք է կոդավորել ու գաղտնազերծել ազդանշանը, հաղորդել ու ընդունել, որպեսզի կապն ավելի արագ ու որակյալ լինի»,- NEWS.am - ի թղթակցին հայտնել է նախագծի մշակող, Հայաստանի պետական ինժեներական համալսարանի ռադիոտեխնիկայի ու կապի համակարգերի ֆակուլտետի ասպիրանտ Լեւոն Գրիգորյանը։
Սարքը հավաքելու բաղադրիչները Գրիգորյանին ու նրա ընկերներին տրամադրել է National Instruments ընկերությունը։ Փորձարկման համար ալգորիթմերը ասպիրանտներն իրենք են ստեղծել։
Սարքն արդեն ներկայացվել է նոր սերնդի ցանցերի թեմայով գիտաժողովի ժամանակ, որը անցել է Սանկտ Պետերբուրգի Բոնչ-Բրուեւիչի անվան հեռահաղորդակցությունների պետական համալսարանում։ Իսկ հոկտեմբերի սկզբին այն ցուցադրվել է Երեւանում DigiTec Expo – 2016 տեխնոլոգիական ցուցահանդեսի ժամանակ։
Նշենք, որ 5G անլար կապի ստանդարտը մշակվում է որպես նեկայումս ամենաարագ կապի՝ LTE (4G)-ի ապագա փոխարինող։ 5G-ի համար միասնական ստանդարտ դեռ չկա, բայց մշակողները կողմնորոշվում են 1 գիգաբիթ/վայրկյանում հզորությամբ։ Նոր սերնդի կապի մոդեմները ապագայում ծրագրվում է ավելի լայնորել կիրառել ոչ միայն համակարգիչերում ու բջջային հեռախոսներում, այլեւ կենցաղային տեխնիկայի, ավտոմեքենաների վրա՝ դրանք հեռավորության վրա կառավարելու նպատակով։
