Հայաստանը միացել է ԱՊՀ-ի ավտոարդյունաբերության զարգացման համաձայնագրին: Որոշումը հավանության է արժանացել հոկտեմբերի 20-ի Կառավարության նիստում:
Ըստ համաձայնագրի՝ ԱՊՀ երկրները կհամագործակցեն ավտոհոսքագծերի եւ արտադրության այլ միջոցների (ինչպես մեքենաների, այնպես էլ պահեստամասերի) արդիականացման ոլորտում, նաեւ կզարգացնեն մատակարարողների եւ արտադրողների միջեւ կոոպերատիվ կապերը:
Վարչապետ Կարեն Կարապետյանը տնտեսական զարգացման եւ ներդրումների նախարար Սուրեն Կարայանից հետաքրքրվել է, թե Հայաստանն այդ համաձայնագրի կարիքն ինչո՞ւ ունի, երբ հանրապետությունում ավտոմոբիլային արդյունաբերություն չկա: «Գուցե մեր «ԵրԱԶ» գործարանն աշխատելո՞ւ է»,- հարցրել է նա ժպտալով (գործարանը պաշտոնապես փակվել է 2002 թվականից, իսկ ոչ պաշտոնապես՝ ավելի վաղ - խմբ.):
«Ավտոգործարանի մասով չգիտեմ, սակայն արդեն ունենք ավտոպահեստամասեր արտադրողներ, այդ պատճառով համաձայնագիրն ավելորդ չի լինի»,- պատասխանել է Կարայանը: