Սեւան- Երեւան ավտոճանապարհին 3 օր առաջ վթարված ուսանողական բարեգործական միկրոավտոբուսի վարորդ Գագիկ Ստեփանյանի ընտանիքի անդամները կարծում են՝ վթարի պատճառը եղել վատ եղանակային պայմաններն է եղել:
NEWS.am-ի թղթակցի հետ զրույցում վարորդի որդին՝ Գնուն Ստեփանյանը, նշեց, որ մեքենան անսարք չի եղել, որեւէ թերություն բացարձակապես չի ունեցել:
«Ես չգիտեմ՝ կոնկրետ ինչ է տեղի ունեցել, դեպքն իմանալուն պես եմ Հայաստան վերադարձել ու դեպքի մանրամասների մասին ոչ մեկի հետ չեմ խոսել: Վստահ եմ, որ անսարք չի եղել մեքենան, արագությունն էլ 40-50կմ/ժ է եղել: Կարծում եմ՝ վատ եղանակային պայմանների պատճառով է եղել, կարող է՝ անվադողերն էլ մի թեթեւ մաշված լինեն, բնականաբար եղանակն էլ տեսնելով՝ Երեւան հասնելուն պես պիտի փոխեր, բայց դե ես չեմ իմանում՝ ինչ անվադողերով է եղել»,- ասաց որդին:
Ուսանողական բարեգործական միկրոավտոբուսը սկսել էր գործել հոկտեմբերի 17-ից: Ըստ Վարսեր գյուղում տարածված լուրերի՝ գյուղապետի թեկնածու Հուսիկ Սեդրակյանի մտահղացումն է անվճար միկրոավտոբուսները: Գնուն Ստեփանյանի խոսքով՝ ինքը տեղյակ չէ, թե ով է հովանավորը, ում հետ է հայրը պայմանավորվածություն ձեռք բերել. «Գյուղում խոսում են, թե Հուսիկ Սեդրակյանի մեքենան է, բայց նման բան չկա: Ես եմ Ռուսաստանից գումար ուղարկել, հայրս գնել է միկրոավտոբուսը, որ հետ գամ, Հայաստանում փող աշխատեմ էդ ավտոյով»:
Գագիկ Ստեփանյանը, որդու պնդմամբ, 25 տարվա վարորդական փորձ ունի, երկար տարիներ Ռուսաստանում մեքենա է վարել:
«Գյուղում փնովում են հորս/ ընտրություններ են երկու օրից, էս դեպքն էլ օգտագործում են, բայց սա դժբախտ դեպք է, փորձանք է: Մենք ոչ մեկի հետ գյուղում ոչ մի խնդիր չենք ունեցել, դիտավորություն չի եղել, ինչպե՞ս կարող էր դիտավորություն լինել»,- նշեց Գնուն Ստեփանյանը:
Ի դեպ, Տրանսպորտի, կապի եւ տեղեկատվական տեխնոլոգիաների նախարարության պաշտոնական տեղեկատվության՝ մեքենայի անվադողերը եղել են մաշված:
Նշենք, որ միկրոավտոբուսի վարորդը դեռեւս գտնվում է հիվանդանոցում, նա ողնաշարի վնասվածք ունի: Գնուն Ստեփանյանի խոսքով՝ հոր վիճակը ծանր է, 40 օր պետք է անշարժ պառկի, որից հետո միայն պարզ կդառնա, թե հետագայում բարդություններ կառաջանա, թե ոչ:
Ավելի վաղ տեղեկացրել էինք, որ Կոտայքի մարզում 2016թ. հոկտեմբերի 18-ի առավոտյան ժամը 08.30-ի սահմանում խոշոր ու ողբերգական ավտովթար է տեղի ունեցել. Երեւան-Սեւան ավտոճանապարհի 44-րդ կմ հատվածում բախվել են «Օպել» մակնիշի եւ Mercedes Benz Sprinter մակնիշի ավտոմեքենաները։ Վթարի հետեւանքով մահացել էր Վարսեր գյուղի 18-ամյա բնակչուհի Հռիփսիմե Գասպարյանը, մյուսները տեղափոխվել են հիվանդանոց:
