Այս պահին ընթանում է Հայաստան-ԵՄ բանակցությունների հերթական փուլը, որի շրջանակներում քննարկման օրակարգում են Հայաստան-ԵՄ համաձայնագրի առեւտրին եւ ներդրումներին վերաբերող գլուխների տեքստերը: Այս մասին, այսօր՝ հոկտեմբերի 24-ին, լրագրողների հետ հանդիպման ժամանակ նշել է ՀՀ տնտեսական զարգացման եւ ներդրումների փոխնախարար Գարեգին Մելքոնյանը՝ ներկայացնելով Հայաստանում այսօր մեկնարկած «ԵՄ-ն բիզնեսի համար» խորագրով միջոցառումների շարքը:
Նրա խոսքով, այդ տեքստերի զգալի մասով հնարավոր կլինի համաձայնության հասնել. «Ունենք տասից ավել ոլորտներ, որոնց վերաբերում է փաստաթուղթը, որոնք նույնպես բանակցվում են: Սա բանակցային չորրորդ փուլն է։ Բանակցությունների ընթացքը դրական ու կառուցողական եմ գնահատում: Բազմաթիվ հարցերում մենք եկել ենք ընդhանուր համաձայնության, բայց դեռևս կան հարցեր, որոնք նեղ մասնագիտական են ու դեռ քննարկվում են»:
Նրա խոսքով, Հայաստանի եւ ԵՄ-ի միջեւ ընդգրկուն գործընթաց կա. «Մեկ տարի առաջ հաստատեցինք ՓՄՁ ռազմավարությունը, որն առաջիկա տարիներին լինելու է հիմնական փաստաթուղթը այդ ոլորտի զարգացման գործում։ Այն հիմնված է ԵՄ-ում փոքր բիզնեսի զարգացման ակտի վրա։ Հայաստանն ունեցել է ամենամեծ առաջընթացը «Արեւելյան գործընկերության» 6 երկրների շարքում»:
Գարեգին Մելքոնյանը նշեց, որ ԵՄ-ի հետ համագործակցության շրջանակներում մեծ տեղ ունի նաեւ բյուջետային աջակցությունը, մասնավորապես, բազմաոլորտ համագործակցության շրջանակում Եվրամիությունը Հայաստանին է տրամադրել 45 մլն եվրո, 29 մլն եվրո, 25 մլն եվրո եւ 12 մլն եվրո բյուջեով աջակցություն:
