Եվրախորհրդարանը Թուրքիային կոչ է արել ազատ արձակել բոլոր լրագրողներին, որոնց ազատազրկել են առանց նրանց հանցավոր գործունեության մասին ծանրակշիռ ապացույցների։ 2016-ի հուլիսի 15-ին Թուրքիայում տեղի ունեցած պետհեղաշրջման փորձը չի կարելի օգտագործել որպես պատրվակ՝ մամուլին ու ընդդիմությանը լռեցնելու համար, շեշտված է բանաձեւում, որը ընդունել են Եվրախորհրդարանի պատգամավորները, փոխանցում է DW–ն։
Պետհեղաշրջման անհաջող փորձից հետո Թուրքիայի իշխանությունները կալանավորել են առնվազն 99 լրագրողների ու գրողների, եւս առնվազն 330 լրագրող զրկվել է մամուլի հավատարմագրումից։ Բացի դրանից երկրում փակվել է 100 լրատվամիջոց, ինչի հետեւանքով աշխատանքից զրկվել է ավելի քան 2300 մարդ։
Եվրախորհրդարանի տվյալներով Թուրքիայում կալանավորված լրագրողների համար փաստաբանների ծառայությունը սահմանափակվել է, նրանց կալանքի տակ են պահում մարդկային արժանապատվությունը ստորացնող պայմաններում, սպառնում ու կտտանքների ենթարկում։ Ընդ որում բանաձեւը կտրականապես դատապարտում է նաեւ ռազմական հեղաշրջման փորձը։
Ըստ «Լրագրողներ առանց սահմանի» կազմակերպության գնահատականի՝ Թուրքիան 180-ից 151-րդ տեղն է զբաղեցնում մամուլի ազատության ամենամյա գործակցում։ Ավելի վաղ Human Rights Watch իրավապաշտպան կազմակերպությունը Թուրքիայի իշխանություններին մեղադրել էր բանտարկյալների հանդեպ կտտանքների՝ այդ թվում ծեծի ու սեռական բռնությունների մեջ։