ԱՄՆ Փենսիլվանիա նահանգի դատարանը ցանցահենին 18 ամսվա ազատազրկման է դատապարտել հանրահայտ մարդկանց հաշիվները կոտրելու ու այնտեղից մերկ աստղերի լուսանկարներն ու տեսագրությունները գողանալու համար։ 36-ամյա Ռայան Քոլինզը մեղավոր է ճանաչվել այս տարվա մայիսին, հայտնում է BBC–ի Ռուսական ծառայությունը։

Քննությունն ապացույցներ չի գտել, որ Քոլինզը որեւէ կերպ տարածել է գողացված նյութերը, դրա համար էլ նրան մեղադրել են միայն 600 օգտատերերի անձնական տվյալների կողոպուտի մեջ։

Գաղտնաբառերը ստանալու համար Քոլինզն իր զոհերին՝ այդ թվում Ջենիֆեր Լոուրենսին, Քեյթ Ափթոնին, Սքարլեթ Յոհանսոնին ու Քիրսթեն Դանսթին էլեկտրոնային նամակներ է ուղարկել՝ Google-ի կամ Apple-ի աջակցության ծառայությունների անունից։

Մերկ դերասանուհիների ու երգչուհիների լուսանկարները հայտնվել են համացանցում։

Քոլինզը լուսանկարները գողացել է 2012-2014 թթ․ ժամանակահատվածում։ Նրան մեղադրանք է առաջադրվել Լոս Անջելեսում, սակայն դատավճիռը կայացվել է Փենսիլվանիայում, որտեղ նա ապրում է։