Խոշտանգումների, անմարդկային կամ արժանապատվությունը ստորացնող վերաբերմունքի ու պատիժների կանխման եվրոպական հանձնաժողովը Հայաստան կատարած 4-րդ այցելության արդյունքում զեկույց է հրապարակել։

Փաստաթղթում ասվում է, որ իրենք հնարավորություն են ունեցել գնահատել իշխանությունների ձեռնարկած միջոցները, որոնք իրականացվել են նախորդ այցելություններից հետո Հանձնաժողովի տված հանձնարարականներից հետո։

Այդ կապակցությամբ հատուկ ուշադրություն է հատկացվել ոստիկանությունում կալանքի տակ գտնվող անձանց նկատմամբ դաժան վերաբերմունքը կանխարգելող նախազգուշական միջոցներին, ինչպես նաեւ կալանավայրերում նրանց պահելու պայմաններին։ Պատվիրակությունը այցելել է նաեւ հոգեբուժական հաստատություններ հարկադիր հիմունքներով հոսպիտալացված հիվանդների բուժման ընթացքն ու իրավական երաշխիքներն ուսումնասիրելու նպատակով։

Հանձնաժողովը Հայաստանի իշխանություններին կոչ է արել ուժեղացնել ՀՔԾ անձնակազմը՝ դրանով իսկ վերացնելով տեղերում ոստիկանության աշխատակիցների գտնվելու անհրաժեշտությունը, ինչպես նաեւ ապահովել այն, որ դաժան վերաբերմունքի մասին ֆորմալ բողոքները Ոստիկանությունից անհապաղ ուղարկվեն Քննչական ծառայություն։

Պատվիրակությունն առաջին անգամ այցելել է Արմավիրի եւ Վանաձորի բանտերը, ինչպես նաեւ ստուգումներ է իրականացրել Նուբարաշեն, Երեւան–Կենտրոն բանտերում եւ Դատապարտյալների հիվանդանոցում։

Զեկույցում ասվում է, որ բանտերի ծանրաբեռնվածությունը պետական մասշտաբով խնդիր չէ, սակայն որոշ հաստատություններ դեռեւս ծանրաբեռնված են, օրինակ՝ Նուբարաշենը։ Այս կապակցությամբ Հանձնաժողովն ի գիտություն է ընդունել տարբեր օրենսդրական եւ կազմակերպչական միջոցները այդ խնդրի դեմ պայքարի համար եւ հետեւողականորեն խորհուրդ է տվել իշխանություններին միջոցեր ձեռնարկել։

Զեկույցում նշվում է, որ կաշառակերությունը դեռեւս խնդիր է Հայաստանի պատժիչ համակարգում, եւ Հանձնաժողովը իշխանություններին կոչ է արել ակտիվացնել ջանքերը այդ երեւույթի դեմ պայքարում։

Հայաստանի ղեկավարությունը, ի պատասխան այդ զեկույցի, պատրաստակամություն է հայտնել համագործակցել Հանձնաժողովի հետ թե՛ պատվիրակությունների այցերը թեթեւացնելու առումով, թե՛ հանձնարարականներին ի պատասխան ընդունած միջոցների պլանում։

ՀՀ իշխանությունները հայտնել են, որ գնահատում են Հանձնաժողովի  հետ կառուցողական երկխոսությունը եւ ուշադրություն կդարձնեն հանձնարարականներին։