«Բարգավաճ Հայաստան» կուսակցությունում չեն բացառում, որ հնարավոր է դեկտեմբերի 3-ին նախատեսված ԲՀԿ քաղաքական խորհրդի ընդլայնված նիստում Գագիկ Ծառուկյանին քաղաքականություն վերադառնալու կոչ արվի: ԱԺ ԲՀԿ խմբակցության պատգամաբոր Միքայել Մելքումյանը «Ազատություն» ռադիոկայանի azatutyun.am հետ զրույցում այսօր՝ նոյեմբերի 23-ին, ասել էր, որ որեւէ բան չի բացառում եւ ԲՀԿ-ի քաղաքական խորհուրդը կարող է դիմել Գագիկ Ծառուկյանին: «Որեւէ բան բացառված չէ: Դա քաղաքական խորհրդի գործն է: Ես չեմ բացառում, որ նաեւ այդ հարցը կարծարծվի․․․ Այո, մենք բոլորս համոզված ենք, որ Գագիկ Ծառուկյանի հետ միասին «Բարգավաճը» շատ ավելի հզոր կլինի, շատ ավելի կենսունակ կլինի: Ինքը մեր հիմնադիրն է, եւ էս երկրում, մեր պետության մեջ մեծ ավանդ ունեցող անձնավորություն է, որը շարունակում է տարբեր տիպի ծրագրեր իրականացնել, միջոցառումներ իրականացնել»,- նշել էր Մելքումյանը:
NEWS.am-ի հետ զրույցում ԲՀԿ մամուլի խոսնակ Վանիկ Էլիզբարյանը նշեց, որ ինքը եւս ոչինչ չի կարող բացառել:
«Դեկտեմբերի 3-ին նախատեսված է ԲՀԿ քաղաքական խորհրդի ընդլայնված նիստ, որին կմասնակցեն նաեւ ԲՀԿ տարածքային կառույցների ակտիվները: ԲՀԿ քաղաքական խորհրդի նիստը լինելու է փակ, իսկ նիստի ընթացքում քննարկվելու են առաջիկա ընտրությունների կազմակերպչական հարցերը եւ հստակեցվելու է մարզային այցելությունների ժամանակացույցը»,-ասաց նա: