Այս կամ այն կուսակցությանը նոր մարդկանց անդամագրվումը տվյալ կուսակցության ներքին գործն է: Այս մասին այսօր՝ նոյեմբերի 29-ին, մամուլի ասուլիսի ժամանակ հայտարարեց Հանրապետըական կուսակցության պատգամավոր Լեւոն Մարտիրոսյանը՝ անդրադառնալով շատ կարճ ժամանակահատվածում ՀՀԿ-ին միանգամից 7 հազար մարդու անդամագրման հարցին:
Նրա խոսքով՝ տեղին չէ քննարկել այն, ինչը տեղի է ունենում այս կամ այն կուսակցության ներսում. դա կուսակցության անդամների եւ նրա հետ կապված անձանց խնդիրն է: «Կուսակցության կշիռը ոչ թե նրա անդամների քանակով է որոշվում, այլ ընտրություններում նրա ստացած ձայների քանակով: Կարելի է զանազան օրինակներ բերել, թե ինչպես են փոքրաթիվ կուսակցությունները մեծ հաջողությունների հասնում»,- նշեց Լեւոն Մարտիրոսյանը:
Ասուլիսի մյուս բանախոսը՝ «Ժառանգություն» խմբակցության պատգամավոր Թեւան Պողոսյանը, համաձայն է այն կարծիքին, որ կուսակցության շարքերում նոր անդամների ընդունումը տվյալ կուսակցության ներքին գործն է: «Բայց դրա հետ մեկտեղ, Հանրապետական կուսակցության 7 հազար մարդու անդամագրվելու տեղեկությունը ինքը կուսակցությունն է ներկայացրել: Ինչո՞ւ եք դուք դա հատուկ ընդգծում եւ թեման Հայաստանի քաղաքական օրակարգի հարց դարձնում: Եթե ինքներդ եք այդ մասին ասել, նշանակում է՝ փորձել եք այն օրակարգ մտցնել»,- ընդգծեց Թեւան Պողոսյանը:
