Հայ–ռուսական միավորված զորախումբ ստեղծելը բխում է Հայաստանի շահերից։ Այս մասին դեկտեմբերի 2-ին՝ մամուլի ասուլիսի ժամանակ, ասել է ՀՀ պաշտպանության նախկին նախարար Վաղարշակ Հարությունյանը։
Նրա խոսքով՝ Միավորված զորախումբ ստեղծելու մասին փաստաթուղթը Հայաստանում ռուսական բազայի շարունակությունն է։ «Այդ համաձայնագրում հստակ նշվում է, որ Միավորված զորախումբը կգործի միայն Հայաստանի դեմ ագրեսիայի դեպքում։ Այսինքն՝ զորախումբը չի կարող օգտագործվել այլ նպատակներով եւ ուղղված չէ երրորդ կողմի դեմ»,– ասել է Հարությունյանը եւ հավելել, որ Վրաստանին ոչ մի վտանգ չի սպառնում։
Պատասխանելով Ռուսաստանի ազդեցության ուժեղացման մասին հարցին՝ Վաղարշակ Հարությունյանն ասաց. «Ռուսաստանի ազդեցությունը բնական է, եւ մենք դրան համաձայնել ենք։ Իսկ ԱՄՆ բանակը Գերմանիայի վրա ազդեցություն ունի՞։ Բնականաբար այո։ Մենք լուծում ենք մեր անվտանգության խնդիրը»։
Միաժամանակ ՀՀ պաշտպանության նախկին նախարարը նշեց, որ համաձայնագիրը չի կարող գործել Ղարաբաղի դեպքում, քանի որ վերջինս Հայաստանի կազմում չէ։ «Ռազմաբազայի եւ ՀԱՊԿ–ին անդամակցելու մասին համաձայնագիրը ապահովեցին Հայաստանի հաղթանակը Ղարաբաղում»,– հավելեց Վաղարշակ Հարությունյանը։