Google-ի կրթության եւ համալսարանական կապերի տնօրեն Մեգի Ջոնսոնը կարծում է, որ ծրագրավորման դպրոցների շրջանավարտներն այնքան էլ պատրաստված չեն Google-ում աշխատելու համար եւ լրացուցիչ թրեյնինգների կամ աշխատանքային փորձի կարիք ունեն, գրում է Business Insider-ը:
Այժմ շատերն են ծրագրավորման դպրոցներ հաճախում՝ վերապատրաստվելու եւ նոր մասնագիտություն ստանալու համար: Ունենալով ծրագրավորման մինիմալ գիտելիքներ՝ նրանք, մի քանի ամիս դասեր վերցնելով, կարողանում են իրենց տեղը գտնել տեխնոլոգիական ոլորտում: Դա սովորական մեխանիզմ է, բայց չի աշխատում Google-ի դեպքում. ընկերությունը ծրագրավորման դպրոցների տված գիտելիքները բավարար չի համարում աշխատանքի վերցնելու համար:
«Անկեղծ ասած, նույնիսկ ծրագրավորման ուղղվածությամբ քոլեջների շրջանավարտները փորձի կարիք ունեն ոլորտում աշխատելու համար: Բայց օրինակ 4-5 տարվա ուսումնառության փորձ ունեցողներն ավելի լավ պատկերացումներ ունեն ծրագրավորման մասին»,- ասել է Google-ի կրթության եւ համալսարանական հարաբերությունների տնօրենը:
Bloomberg-ը նշում է, որ ծրագրավորման դպրոցների վարձը երբեմն 14 շաբաթվա դասընթացների համար կարող է հասնել 14 400 ԱՄՆ դոլարի: Նման դպրոցներում սովորելն իմաստ ունի, եթե ավարտելուց հետո հնարավորություն է լինում բարձր աշխատավարձով աշխատանք գտնել ոլորտում: Շատերն իրոք հաջողում են, սակայն չկա որեւէ ցուցանիշ, որ կարողանա առանձնացնել լավ ուսանողներին կամ լավ դպրոցները. ամեն ինչ անհատական է: Դա էլ հենց առաջացնում է Google-ի կամ նմանատիպ խոշոր ընկերությունների անվստահությունը ծրագրավորման դպրոցների հանդեպ:
