Պակիստանի հյուսիսում կործանված ուղեւորատար օդանավի որոնողական աշխատանքները դժվարանում են լեռնային տեղանքի եւ վատ եղանակային պայմանների պատճառով։ Այս մասին հայտնել են փրկարար ծառայությունների աշխատակիցները։
Ավելի վաղ հայտնել էինք, որ Pakistan International Airlines–ի երկշարժիչ օդանավը, որում 47 ուղեւոր էր եղել, անհետացել էր ռադարների էկրաններից։ Չիթրալ–Իսլամաբադ չվերթն իրականացնող օդանավը թռիչքից մեկուկես ժամ անց անհետացել էր։ Հայտնի է, որ վթարից առաջ օդաչուն SOS ազդանշան էր ուղարկել եւ հայտնել տեխնիկական անսարքությունների մասին։ Ըստ նախնական տեղեկությունների՝ օդանավում եղած բոլոր ուղեւորները զոհվել են։