Երեւանի Հյուսիսային պողոտայում դեկտեմբերի 10-ին տեղի ունեցավ Սուրբծննդյան ցուցահանդես-տոնավաճառի հանդիսավոր բացումը: Ամենամյա տոնավաճառի բացման պատվարժան իրավունքը տրվեց Օլիմպիական չեմպիոն Արթուր Ալեքսանյանին: (ֆոտոռեպորտաժ)
Լրագրողների հետ զրույցում միջոցառման կազմակերպիչ, սփյուռքահայ գործարար Պիեռ Բաղդադյանը նշեց, որ տոնավաճառը կազմակերպվում է 5-րդ տարին անընդմեջ, եւ ամեն տարի դրա մասնակիցների թիվն աճում է:
«Այս տարի ցուցահանդեսին ներկայացված է 33 տաղավար, որտեղ երեւանցիներն ու մայրաքաղաքի հյուրերը կարող են ամենատարբեր հուշանվերներ գնել Սուրբ ծննդյան եւ Ամանորի թեմատիկայով»,- ասաց Բաղդադյանը:
Մեծամասամբ տաղավարներում տարբեր հուշանվերներ են, տոնական զարդեր եւ քաղցրավենիք: Բաղդադյանի խոսքով՝ նման միջոցառումները եվրոպական երկրներում տոնական միջոցառումների անբաժան մասն են:
«Մենք որոշել ենք այդ ավանդույթը Հայաստան բերել, եւ այսօր շատ ուրախ ենք, որ մեր ակնկալիքները չեն բեկվել: Ամեն տարի աճում է ինչպես մասնակիցների, այնպես էլ հետաքրքրված բնակիչների թիվը»,- նշեց կազմակերպիչը:
Տոնավաճառը կշարունակվի մինչեւ հունվարի 13-ը: