ՀԱԿ–ն այսօր ամենաիրական հետեւողական, սկզբունքային առաջատար  ընդդիմադիր  ուժն է։ Այս մասին NEWS.am–ի  հետ զրույցում ասել է ՀԱԿ խմբակցության ղեկավար Լեւոն Զուրաբյանը։

Պատասխանելով՝ խորհրդարանական ընտրություններում կուսակցության հնարավորությունների մասին հարցին՝ պատգամավորն ասաց. «ՀԱԿ–ն արդեն երկար տարիներ չի շեղվում Հայաստանում իշխանափոխության, ժողովրդավարության հաստատման  նպատակից։ Դա է վկամում սահմանադրական հանրաքվեին մեր մասնակցությունը, «4+4+4» գործընթացը, որի միջոցով մենք իշխանություններին խաղի որոշակի կանոններ թելադրեցինք ընտրությունները վերահսկելու տեսակետից։ Այսինքն՝ այսօր մենք ամենաուժեղ դիրքերն ունենք»։

Զուրաբյանի խոսքով՝ ՀԱԿ—ը նաեւ հասկանում է, որ ժողովուրդն հոգնել է, անտարբեր է, քաղաքականությունից օտարված եւ չի վստահում քաղաքական ուժերին։ «Մենք նաեւ պետք է հասկանանք, որ դա ժամանակավոր երեւույթ է, եւ ընտրությունները կփոխեն դա։ Ժողովուրդն աստիճանաբար կներգրավվի քաղաքական գործընթացներին եւ կսկսի որոշել, թե որ քաղաքական ուժն է արտահայտելու  իր կամքը ընտրություններում։ Հենց քաղաքական մեսիջը կորոշի, թե ում հետեւից նա կգնա։ Ես կարծում եմ, որ ՀԱԿ–ը հիմա ամենաուժեղ մեկնարկային դիրքերում է։ Բայց մենք չպետք է մտածենք, որ դա հաջողության երաշխիք է։ Մենք դեռեւս մեծ աշխատանք ունենք մեր ժողովրդի համընդհանուր անտարբերության հաղթահարման ուղղությամբ»,– ասել է Լեւոն Զուրաբյանը։