Փաստը, որ Թուրքիայի ազգային անվտանգության խորհուրդը Հայաստանին հանել է իր երկրի համար սպառնալիք համարող երկրների ցանկից, ցուցադրական քայլ է, որով Թուրքիան ուզում է ապացուցել, որ ինքն, իբր, ջերմ ու բարեկամական հարաբերություններ ունի հարեւանների հետ: Այս մասին NEWS.am-ի թղթակից հետ զրույցում ասաց Երեւանի պետհամալսարանի արեւելագիտության ֆակուլտետի փոխդեկան, թուրքագետ Ռուբեն Մելքոնյանը:
«Եթե դրան մի փոքր իրատեսորեն նայենք, ապա ներկայումս Հայաստանին, իսկապես, չի կարելի Թուրքիայի համար սպառնալիք համարել, սակայն Թուրքիայի այդ քայլը ունի հեռուն գնացող նպատակներ` սեպ խրել Հայաստանի եւ Սփյուռքի միջեւ: Ես ենթադրում եմ, որ այդ քայլին կարող է հետեւել հայտարարություն, որ սպառնալիքը Թուրքիայի համար գալիս է ոչ թե Հայաստանից, այլ` Սփյուռքից` կապված Հայոց ցեղասպանության միջազգային ճանաչման հետ»,- ասել է թուրքագետը:
Ինչ վերաբերում է նրան, որ Թուրքիան առաջին անգամ արտաքին սպառնալիք է համարել Իսրայելին, ապա, ըստ Մելքոնյանի, այդ քայլով Անկարան ցանկանում է եւս մեկ անգամ ամրացնել իր դիրքերն իսլամական աշխարհում եւ ցույց տալ, որ Թուրքիան մահմեդական եղբայրների հետ է եւ իր գործողություններն Իսրայելի դեմ ոչ թե ցուցադրական են, այլ նպատակային:
Ավելի վաղ NEWS.am-ը հայտնել էր, որ Թուրքիայի Ազգային անվտանգության խորհուրդը երկրի ազգային անվտանգության ռազմավարությունից՝ «Կարմիր գրքից» արտաքին սպառնալիքների ցանկից հանել է Հայաստանին, Սիրիային, Իրանին, Վրաստանին, Ռուսաստանին, փոխարենը որպես արտաքին սպառնալիք ընդգրկելով Իսրայելին, որի հետ տասնամյակներ շարունակ եղել է դաշնակցային հարաբերությունների մեջ, սակայն վերջին շրջանում նրանց հարաբերությունները խիստ վատացել են:
