Հայաստանում նախաձեռնված «Դու ինչ ես արել Ղարաբաղի համար» շարժումն իրեն արդարացրել է: Այս մասին հունվարի 13-ին՝ մամուլի ասուլիսի ժամանակ ասաց սփյուռքի փոխնախարար Սերժ Սրապիոնյանը:
Նշենք, որ Սփյուռքի նախարարությունը 2017-ը հայտարարել է Լեռնային Ղարաբաղի տարի:
Նրա խոսքով՝ շարժման նպատակը մեկն է, որ յուրաքանչյուր հայ պարտավորված լինի Ղարաբաղին օգնել: «Երկրորդ նպատակն այն է, որ Ղարաբաղի իրավիճակի մասին իրական տեղեկատվությունը հասանելի լինի ոչ միայն բոլոր հայերին, այլեւ ամբողջ մարդկությանը եւ այն կառույցներին, որոնք զբաղվում են ղարաբաղյան խնդրի կարգավորմամբ: Նկատի ունենք ինչպես ԵԱՀԿ Մինսկի խմբի համանախագահներին, այնպես էլ տարբեր երկրների օրենսդիր եւ գործադիր մարմինների ներկայացուցիչներին»,- ընդգծեց Սրապիոնյանը՝ հավելելով, որ շարժումը նախատեսում է միավորում հանուն Ղարաբաղի եւ հայերի շրջանում պատասխանատվության զգացման ուժեղացում:
