Ռուսաստանի ԱԳ նախարարության պաշտոնական ներկայացուցիչ Մարիա Զախարովան մեկնաբանել է 2016-ի դեկտեմբերի 29-ին Հայաստանի սահմանին Ադրբեջանի նախաձեռնած վերջին դիվերսիան:
Հիշեցնենք, որ դիվերսիայի հետեւանքով ադրբեջանական կողմը 7 զինծառայողի է կորցրել, այդ թվում՝ մեկ զինծառայողի մարմինը մնացել է հայկական կողմում: Հաշվի առնելով, որ քննություն է ընթանում, հայկական կողմը սպանվածի մարմինը դեռեւս Ադրբեջանին չի փոխանցել, ինչն առաջացրել է Բաքվի նյարդային արձագանքը:
Հունվարի 13-ի ճեպազրույցի ժամանակ Մարիա Զախարովան ի պատասխան հարցին՝ Ռուսաստանի ԱԳՆ-ն ինչպե՞ս կարող է մեկնաբանել հայկական կողմի այս քայլը, նշել է. «Այդ ողբերգական միջադեպը տեղի է ունեցել Հայաստանի եւ Ադրբեջանի միջեւ: Մենք ելնում ենք այն բանից, որ երկու կողմն էլ պետք ուժ, իմաստություն եւ անկասկած դիվանագիտական հնարավորություններ գտնի, ընդհանրապես բոլոր հնարավորություններն օգտագործի այդ շատ բարդ իրավիճակը լուծելու համար: Դրա լուծման բանալին երկու կողմերի ձեռքերում է»: