Հնարավոր է՝ ինչ-որ մեկը ժպտա եւ չհավատա, բայց Երեւանի խոշոր սուպերմարկետներն իրենք են խնդրել իրենց մոտ սանիտարական ստուգում անցկացնել: Այս մասին այսօր՝ հունվարի 16-ին, լրագրողներին ասաց Գյուղատնտեսության նախարարության Սննդամթերքի անվտանգության պետական ծառայության սննդամթերքի վերահսկողության բաժնի պետ Վահե Դանիելյանը:
Նրա հավաստիացմամբ՝ ծառայությունը «Երեւան սիթի» սուպերմարկետների ցանցում (պատկանում է խոշոր գործարար պատգամավոր Սամվել Ալեքսանյանին) ստուգումների մասին պայմանավորվել է 2016-ի նոյեմբերին: «Դա, ի դեպ, նաեւ նրանց է պետք, ոչ միայն մեզ: Իսկ մենք նրանց համար, ըստ էության, անվճար աուդիտ ենք անցկացնում: Արտասահմանում դա բավական թանկ է: Ստուգումներն անցկացվում են սննդամթերքի ընդունման եւ պահպանման բոլոր պարամետրերով եւ դեռեւս չեն ավարտվել»,- հավելեց Դանիելյանը:
