2014-ին Կուալա Լումպուրից Պեկին MH370 չվերթն իրականացնող անհետացած մալայզիական Boeing 777–ի որոնողական աշխատանքները կասեցվել են, մինչեւ նոր տեղեկությունների ի հայտ գալը, որոնք կօգնեն գտնել անհետացած օդանավը։ Այս մասին ասել է Ավստրալիայի տրանսպորտի նախարարը, փոխանցում է ՏԱՍՍ–ը։
Նախարարը նշել է, որ պաշտոնապես խոսքը ոչ թե որոնումների դադարեցման մասին է, այլ կասեցման։ «Այսօր վերջին նավը լքել է որոնումների գոտին։ Մալայզիական ավիաուղիների MH370 չվերթն իրականացնող օդանավը չի հայտնաբերվել Հնդկական օվկիանոսի հարավային գոտում, որտեղ ուսումնասիրվել է 120 հազար քառ/կմ տարածք։ Այդ կապակցությամբ որոշում է կայացվել կասեցնել օդանավի ստորջրյա որոնումները։ Որոշումը հեշտ չի տրվել։ Մենք պահպանում ենք հույսը, որ ապագայում նոր տեղեկություն կհայտնվի, որը կօգնի հայտնաբերել անհետացած օդանավը»,– ասել է նա։
«Մալայզիական ավիաուղիների» Boeing 777-200 օդանավը 2014-ի մարտի 7-ից 8-ի գիշերն իրականացնում էր Կուալա Լամպուրից Պեկին MH370 չվերթը։ Թռիչքի մեկնարկից մոտավորապես երկու ժամ անց ինքնաթիռի հետ կապն ընդհատվել էր: Օդանավում եղել է 227 ուղեւոր եւ անձնակազմի 12 անդամ: Անցյալ տարվա հունվարին Մալայզիայի իշխանությունները հայտարարեցին, որ ինքնաթիռն աղետի է ենթարկվել, եւ բոլոր ուղեւորները զոհվել են:
