«Հիմնադիր խորհրդարանի» անդամ Գեւորգ Սաֆարյանի դատավարությունը օրինական կերպով չի տարվել: Այս մասին, այսօր՝ հունվարի 18-ին, «Գևորգ Սաֆարյանը դատապարտվեց 2 տարվա ազատազրկման. իրավապաշտպանների գնահատականը» թեմայով քննարկման ժամանակ նշել է «Իրավունքի գերակայություն» ՀԿ-ի անդամ Արտակ Զեյնալյանը՝ հավելելով, որ այս գործը վերաքննիչ դատարան հենց այս հիմնավորմամբ պետք է ներկայացնել։
«Դատավորը անվստահելի մարդ է վերաքննիչ բացարկը պետք է ներկայացնել այն հիմնավորմամբ, որ դատավարությունը օրինական կերպով չի տարվել։ Եվ եթե անգամ հասնենք Գեւորգ Սաֆարյանի ազատմանը, դա չի նշանակի, որ հարցը կլուծվի։ Պետք է բոլոր քաղբանտարկյալները ազատ արձակվեն եւ դա կլինի իր եւ բոլորի իրավունքների վերականգնում»,-ասաց նա։
Ավելի վաղ NEWS.am-ը հայտնել էր, որ ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գեւորգ Սաֆարյանին հունվարի 16–ին Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանը մեղավոր է ճանաչել եւ դատապարտել 2 տարի ազատազրկման:Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը, որին հետագայում էլ կալանավորեցին: Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ:
