Նոր խորհրդարանում քաղաքական ուժերի պատկերը գրեթե չի փոխվի։ Այս մասին այսօր՝ հունվարի 18-ին, լրագրողների հետ հանդիպման ժամանակ նշել է սոցիոլոգ Ահարոն Ադիբեկյանը։
«Քաղաքական թատրոնում տեղերը հիմնականում զբաղեցված են. պարտերում նստած է Հանրապետական կուսակցությունը, ամֆիթատրոնում ԲՀԿ-ն էր տեղավորված, ՕԵԿ-ը, Ժառանգությունը, ՀԱԿ-ը։ Էլ տեղ չկա, միջանցքում կանգնելն իմաստ չունի»,- ասաց նա։
Ադիբեկյանի կարծիքով՝ նոր խորհրդարանում իրենց դիրքերը կպահպանեն ՀՀԿ-ն, ԲՀԿ-ն, «Հայկական վերածնունդը», որոշ կուսակցություններ, գուցե, ներկայացվածության փոփոխություններ կրեն։
«ՀԱԿ-ը գուցե պահպանի իր դիրքերը, ՀՅԴ-ն կարող է ավելացնել դիրքերը, քանի որ դարձել է իշխանամետ, «Ժառանգություն» կուսակցության խնդիրը հարցականի տակ է, որովհետեւ մինչընտրական գործընթացներում Րաֆֆի Հովհաննիսյանը չի երեւում»,- ասաց սոցիոլոգը։
Նա նշեց, որ քաղաքական դիրքորոշումներում փոփոխությունների պատճառով կուսակցությունների էլեկտորատի փոփոխություններ են տեղի ունեցել։ «ՕԵԿ-ի դուրս գալը իշխանությունից, ՀՅԴ-ի մտնելը կոալիցիա արդեն բերում են էլեկտորատի վերախմբավորման, որովհետեւ ՕԵԿ-ը կորցնում է իր իշխանամետ էլեկտորատի մասը, ՀՅԴ-ն՝ ընդդիմադիր էլեկտորատինը»։
Ահարոն Ադիբեկյանը ավելացրեց, որ Գագիկ Ծառուկյանի վերադարձը քաղաքականություն եւս ընտրազանգվածի որոշակի փոփոխություններ կհարուցի։
«Ծառուկյանը, հետ գալով, պետք է երկու խնդիր լուծի՝ վերադարձնի իր նախկին համախոհներին եւ միավորի նոր ուժերի։ Եթե նա մնա կենտրոնամետ դիրքում, որը նրան բնորոշ է, նա իր մոտ կբերի իշխանամետ եւ ընդդիմադիր էլեկտորատի մի մասը եւ կպահպանի իր երկրորդ դիքը քաղաքական դաշտում»,- նշեց սոցիոլոգը։
