ԲՀԿ-ն ընտրություններին կգնա «Ծառուկյան դաշինքով», սակայն, կուսակցությունում դեռ չգիտեն, թե բացի ԲՀԿ–ից որ ուժերն են լինելու այդ դաշինքում։
«Ծառուկյան դաշինքին» կմիանան այն ուժերը, որոնք դաշինքի ծրագիրը կընդունեն: Դաշինքը նոր պետք է ձեւավորվի եւ կոնկրետ անունները դեռ չկան, ոչ մի անուն չեմ կարող տալ, նման քննարկումների ես չեմ մասնակցել»,-NEWS.am-ի հետ զրույցում ասաց ԱԺ ԲՀԿ խմբակցության պատգամավոր Լյովա Խաչատրյանը:
ԱԺ ԲՀԿ խմբակցության պատգամավոր Վահե Էնֆիաջյանն էլ «Ծառուկյան դաշինք» ասելով հասկանում է «Գագիկ Ծառուկյան անձի եւ նրա գաղափարների շուրջն համախմբված անձանց»:
«Մարդիկ` քաղաքական եւ հասարակական գործիչները, ընդունելով եւ ողջունելով Գագիկ Ծառուկյանի մուտքը քաղաքական դաշտ, իրենց որոշումը կայացրեցին կանգնելու Գագիկ Ծառուկյան անձի եւ այն գաղափարների ու նպատակների շուրջ, որոնք առաջ քաշեց ԲՀԿ հիմնադիրը: Ըստ էության, իմ անձնական կարծիքով, դա իր տրամաբանությամբ կարող է համարվել դաշինք կամ այլ անվանում, որը կարելի է տալ, բայց բնույթն ու ենթատեքստը դրանից չի փոխվում: Թե ինչ զարգացումներ է սպասվում քաղաքական կյանքում` ժամանակը ցույց կտա, ուղղակի հարկավոր է եւս մի փոքր համբերել»,-NEWS.am-ի հետ զրույցում ասաց նա:
Նշենք, որ այսօր արդեն Իշխան Զաքարյանը նշանակվել է «Ծառուկյան դաշինքի» շտաբի ղեկավար։