Հանրահռչակ ռեժիսոր Ռոման Պոլանսկին հրաժարվել է ֆրանսիական գլխավոր կինոմրցանակներից մեկի՝ «Սեզարի» ժյուրիի նախագահի պարտականությունները կատարելուց, երբ հասարակության շրջանում վրդովմունքի ալիք է բարձրացել իր դեմ 40 տարի առաջ անչափահասի բռնաբարության համար հարուցված գործի հետ կապված:

Կանանց իրավունքների հարցերով նախարար Լորանս Ռասինյոլը լեհական ծագմամբ ռեժիսորի ընտրությունը «բռնությունն օրիկանացնող» էր համարել: Osez Le Feminisme ընկերության ֆեմինիստուհիները կարծում են, որ ռեժիսորը որպես «սեռական բռնարար» անպատիժ է մնացել, քանի որ օգտվում է իր աստղային կարգավիճակից, հայտնում է BBC-ն: 

Անցած շաբաթ ակտիվիստներից մեկը change.org կայքում ստորագրահավաք էր սկսել ռեժիսորին փառատոնի նախագահությունից հանելու պահանջով: 5 օրում այն ավելի քան 60 հազար մարդ է ստորագրել:

Ըստ որում՝ արվեստի մի շարք գործիչներ, այդ թվում՝ «Սեզարի» կազմկոմիտեի անդամներ Պոլանսկուն հրապարակավ պաշտպանել են՝ համարելով, որ 40-ամյա վաղեմության մեղադրանքը 2017 թվականին արդիական չէ:

83-ամյա ռեժիսորը մեղադրվում է 1977 թվականին անչափահաս Սամանթա Գեյմերին բռնաբարելու համար: Այդ ժամանակ նա Քալիֆորնիայում էր ապրում: 1978 թվականին Պոլանսկին դատարանում իրեն մեղավոր է ճանաչել, ապա գաղտնի ԱՄՆ-ը լքել է: ԱՄՆ-ի օրենքներվ նրան 50 տարվա ազատազրկում է սպառնում: