«Ժամանակ» թերթը գրում է. «Հովիկ Աբրահամյանը հայտարարել է ՀՀԿ-ն լքելու մասին: Թեեւ ավելի ճիշտ կլինի ասել, որ ՀՀԿ-ն նախ լքեց Հովիկ Աբրահամյանին, որից հետո նրան այլ բան չէր մնում, քան թողնել կուսակցության շարքերը, քանի որ հակառակ պարագայում նա այդ շարքերում շարունակաբար գլորվելու էր ավելի ու ավելի հետ:

Այդ տեսանկյունից Հովիկ Աբրահամյանը դուրս գալով ՀՀԿ-ից՝ ըստ էության կասեցնում է իր նահանջը, որը սկսվել էր դեռեւս 2016 թվականի հուլիսի 29-ից, երբ Երեւանում ծավալվում էր եւ հանգուցալուծման մոտենում ՊՊԾ գնդի դրամատիկ իրավիճակը: Այդ ժամանակ Հովիկ Աբրահամյանը հայտարարեց, որ թողնում է Երեւանի տնտեսագիտական համալսարանի խորհրդի նախագահի պաշտոնը: Հետո նա թողեց վարչապետի պաշտոնը, հետո նա չկարողացավ ստանալ ՀՀԿ շտաբի պետի պաշտոնը: Այդ անվերջ անկումը մի օր էլ Աբրահամյանին կդարձներ «քաղբանտարկյալ», եւ այդ իմաստով նա պարզապես կասեցնում է այդ անկումը՝ դուրս գալով ՀՀԿ-ից:

Սակայն ավելի ինտրիգային է այն, թե ո՞ւր է գնալու Հովիկ Աբրահամյանը, որը հայտարարում է, թե մնում է քաղաքականության մեջ: Գնալու, ըստ էության, երկու հավանական տեղ կա՝ «Ծառուկյան» դաշինք կամ Սեյրան Օհանյանի գլխավորած դաշինք: Հազիվ թե Հովիկ Աբրահամյանը միանա, ասենք, «Ելք» դաշինքին: Սակայն թե Ծառուկյանի, թե Օհանյանի պարագան եւս խիստ տեսական է, ընդամենը հավանական, քանի որ Աբրահամյանի ներկայությունը այդ դաշինքներին չի կարող տալ ոչինչ, բայց կարող է առաջացնել հանրային անվստահություն՝ նկատի ունենալով Աբրահամյանի կերպարի ընկալումը: Իսկ նա ընկալվում է որպես Հայաստանում իշխող արատավոր համակարգի հենասյուներից մեկը: Պե՞տք է Ծառուկյանին կամ Սեյրան Օհանյանին այդպիսի հենասյուն:

Բանն այն է, որ Աբրահամյանի ընդգրկումը այդ ֆորմատներից որեւէ մեկում պարզապես առավել խորացնելու է այն ընկալումը, որ այդ ֆորմատները իշխանական նախագիծ են, որոնց նպատակը տարբեր դեմքերով միեւնույն իշխանության վերարտադրությունն է:

Հետաքրքրական եւ ինտրիգային է, իհարկե, այն, որ Հովիկ Աբրահամյանը ՀՀԿ-ն լքելու մասին հայտարարում է այն բանից հետո, երբ այցելել էր Ռուսաստան եւ հանդիպում ունեցել ՌԴ վարչապետ Դմիտրի Մեդվեդեւի հետ:

Ի դեպ, հետաքրքրական է, որ երեկ էլ Մոսկվա է մեկնել վարչապետ Կարեն Կարապետյանը, եւ հարց է առաջանում՝ արդյոք պատահակա՞ն է, որ Աբրահամյանն էլ ՀՀԿ-ից դուրս գալու մասին հայտարարում է հենց նույն օրը: Ուշագրավ է այն, որ Աբրահամյանի հեռանալու մասին տեղեկության պաշտոնականացումից հետո դիտարկվող վարկածներում բացակայում է այն, որ նա կարող է քաղաքականության մեջ մնալ նոր ուժի ձեւավորումով: Այդ տարբերակն, իհարկե, կնշանակի, որ նա չի մասնակցելու խորհրդարանի ընտրությանը:

Բայց խնդիրն այն է, որ 2017 թվականի խորհրդարանի ընտրությունը անցկացվում է իրականում խայտաբղետ դաշինքներով, երբ ակնհայտ է, որ դրանք լինելու են ժամանակավոր, անցումային դաշինքներ, եւ իրականում քաղաքական դաշտի եւ համակարգի վերաձեւումը լինելու է շատ ավելի երկար գործընթաց, որի հիմնական մասը, կուլմինացիան լինելու է հենց խորհրդարանական ընտրություններից հետո:

Եվ այս տեսանկյունից երեւի թե պետք չէ բացառել, որ Աբրահամյանը պատրաստվում է հետընտրական զարգացումներին, կամ Աբրահամյանին են պատրաստում այդ զարգացումներին»:

Առավել մանրամասն՝ թերթի այսօրվա համարում