Դեկտեմբերի 30-ից հունվարի 5-ը Նոր Արեշի 33-րդ փողոցի տներից մեկից գողություն է կատարվել: Այդ օրը ինչ-որ մեկը հարմարեցված գործիքով բացել էր պատուհանը, մտել ներս, իրերը տակնուվրա արել եւ ննջասենյակի պահարանից գողացել 750 հազար դրամի ոսկեղեն:
Տուն վերադարձած տանտերը գողության մասին հայտնել է ոստիկաններին: Նա ոստիկաններին պատմել է. «5-6 օր տնից բացակայել ենք, հետո վերադարձել ենք, կինս մտել է սենյակ ու տեսել, որ ինչ-որ խառնաշփոթ ա պահարաններում: Լուսամուտը բաց էր, մտածեցինք, որ գողություն է եղել, տեսանք ոսկեղենը չկա»:
Հարեւանները տան մոտ կասկածելի անձանց չեն նկատել:
Ոստիկաններին հաջողվել է պարզել, որ կասկածյալը տանտիրոջ մտերիմներից է՝ Նոր արեշի բնակիչ Գառնիկ Չ.-ն: Նա տանտիրոջ ընկերն էր, հաճախ էր եղել նրանց տանը, իմացել էր, որ ընկերոջ ընտանիքը Ամանորը քաղաքից դուրս է դիմավորելու, որոշել էր անակնկալ մատուցել:
Գառնիկ Չ.-ն խոստովանել է, որ զարդերը վաճառել է Խորենացու փողոցի ոսկու շուկայում: Գողոնը հայտնաբերելու ուղղությամբ միջոցառումներ են ձեռնարկվում: