Առնվազն 5 մարդ է զոհվել, եւս մի քանիսը վիրավորվել Սոմալիի մայրաքաղաք Մոգադիշոյում հյուրանոցի վրա մահապարտ ահաբեկիչների իրականացրած 2 հարձակումների հետեւանքով։ Այս մասին հաղորդում է չինական «Սինհուա» գործակալությունը՝ վկայակոչելով տեղի ոստիկանությունը։
Զինված անձինք ներխուժել են բարձրաստիճան պետական պաշտոնյաների շրջանում մեծ համբավ վայելող Dayah հյուրանոցն այն բանից հետո, երբ մուտքի մոտ պայթեցրել են պայթուցիկով բեռնված մեքենան։ «Մի քանի րոպե անց հնչել է մեկ այլ մեքենայի պայթյունը, ինչի հետեւանքով մեծ թվով զոհեր են եղել», – հայտնել է ոստիկանության ներկայացուցիչը՝ հավելելով, թե 5 մարդ զոհվել է հյուրանոցի մոտակայքի մասնակիորեն քանդված ռեստորաններից մեկում։
Աղբյուրը հայտնել է, որ պայթյունի եւ հարձակման պահին հյուրանոցում են գտնվել Սոմալիի օրենսդիրներ եւ կառավարության պաշտոնատար անձինք, , որոնք հյուրանոց էին ժամանել առաջիկա նախագահական ընտրությունների աշխատանքներին մասնակցելու նպատակով։
Ահաբեկչության պատասխանատվությունը ստանձնել է Սոմալիում գործող «Աշ–Շաբաբ» ծայրահեղական խմբավորումը։
