Բլոգեր Ալեքսանդր Լապշինի արտահանձնումը միջազգային իրավունքի աննախադեպ խախտում է: Այս մասին NEWS.am-ի հետ զրույցում ասաց Լեռնային Ղարաբաղի Հանրապետության նախագահի մամուլի քարտուղար Դավիթ Բաբայանը:
«Լուկաշենկոն դրանով երկիրը խայտառակեց, եթե ոչ մարդկայնի օրենքներով, ապա՝ Աստվածային: Սակայն հարցն ավելի խորքային է: Փաստորեն, միջազգային հանրությունն ու միջազգային իրավունքն անզոր գտնվեցին Ադրբեջանի իշխանությունների կոռուպցիոն-ահաբեկչական գործողությունների դեմ»,- նշեց Դավիթ Բաբայանը:
Նա հիշեցրեց, որ ինչպես պարզվել է լրատվամիջոցների հրապարակումներից, Ալեքսանդր Լապշինը Ինտերպոլով չէր հետախուզվում, իսկ Բելառուսի նախագահը բոլորի համար լսելի ստել է: «Միջազգային իրավունքի կոպիտ խախտման եւ ստի, նաեւ այլեւայլ արարքների համար իր՝ Լուկաշենկոյի նկատմամբ էր պետք հետախուզում հայտարարել: Սակայն դրան ավելանում է նաեւ Ինտերպոլին զրպարտելը, եւ կառույցի ղեկավարությունը դրա մասին պետք է մտածի:
Ինչ վերաբերում է միջազգային հանրությանը, ապա Ռամիլ Սաֆարովին հանձնելու եւ հետագայում հերոսացնելու հանդեպ արձագանքի բացակայությունը նախադեպեր է ստեղծել նաեւ Լապշինի գործի համար: Միջազգային հանրությունը ցույց է տվել, որ անզոր է Մարդու իրավունքների պաշտպանության հարցում: Իսկ ի՞նչ կպատահի, եթե Լեռնային Ղարաբաղը, ենթարկվելով կեղծ խաղաղասերների հորդորներին, պաշտպանությունը թուլացնի: Ցեղասպանություն կկատարվի, իսկ միջազգային իրավունքը կլռի, ինչպես լռեց Սաֆարովին հանձնելիս, ինչպես լռում է Լապշինին արտահանձնելիս:
Ավելին՝ Ադրբեջանի ապրիլյան ագրեսիայի արձագանքը խաղաղ կոչերն էին: Մենք դեմ չենք խաղաղ կոչերին, բայց դրանք բավարար չեն լկտի ագրեսիան զսպելու համար: Իսկ կոնկրետ գործողություններ եւ հասցեական հայտարարություններ այդպես էլ չհետեւեցին»,- նշեց Դավիթ Բաբայանը:
