Հայաստանում՝ Լեռնային Ղարաբաղի Հանրապետության ներկայացուցչությունում տեղակայված ընտրատեղամասում, ժամը 14։30-ի դրությամբ, Արցախում տեղի ունեցող սահմանադրական փոփոխությունների հանրաքվեին մասնակցել է ընտրողների մոտ 40 տոկոսը։ Այս մասին այսօր՝ փետրվարի 20-ին, NEWS.am-ի հետ զրույցում նշեց N Ե/1 հանրաքվեի տեղամասային հանձնաժողովի նախագահ Արմեն Պետրոսյանը։
«Տեղամասում՝ հիմնական ցուցակով, գրանցված է 565 մարդ ու այս պահի դրությամբ հանրաքվեին մասնակցել են մոտ 200 հոգի»,-ասաց նա։
Հանձնաժողովի նախագահը մասնակիցների ակտիվությունը նորմալ է գնահատում՝ նշելով, որ ժամը 16։00-ից հետո հոսքը կավելանա։
«Ակտիվությունը կարելի է գնահատել նորմալ։ Քանի որ այսօր Հայաստանում աշխատանքային օր է, եւ ինչպես գիտենք, այս ընտրատարածքում քվեարկում են ԼՂՀ այն քաղաքացիները, որոնք գործուղման մեջ են Հայաստանում, ուսանողներ են, աշխատանքի բերումով են այստեղ, այդ պատճառով ավելի ուշ կգան։ Ինձ թվում է, որ 16-ից հետո ակտիվությունը ավելի կմեծանա»,-նշեց նա։
Հիշեցնենք, որ այսօր՝ փետրվարի 20-ին, Արցախի Հանրապետությունում անցկացվում է սահմանադրական փոփոխությունների հանրաքվեն, եւ այն քաղաքացիները, որոնք գտնվում են ՀՀ-ում, քվեարկում են Հայաստանում ԼՂՀ մշտական ներկայացուցչությունում։
Արցախի Հանրապետության Սահմանադրության նախագծի վերաբերյալ հանրաքվեի քվեարկությանը մասնակցելու իրավունք ունի 102 757 քաղաքացի: Հանրաքվեն անցկացնելու համար ստեղծվել է 280 ընտրական տեղամաս՝ 12 ընտրատարածքում:
Հանրաքվեում «այո»-ի հաղթանակի դեպքում երկիրը կիսանախագահական կառավարման համակարգից կանցնի նախագահական համակարգի: