«Հայ կանանց ճակատի» ներկայացուցիչներն այսօր՝ փետրվարի 20-ին, բողոքի ակցիա են իրականացրել ՀՀ ԱՆ «Դատապարտյալների հիվանդանոց» ՔԿՀ-ի դիմաց՝ ի պաշտպանություն «Սասնա ծռեր» խմբի անդամներին հաց տարած Արթուր Սարգսյանի:
Նրանք իրենց հետ հաց էին տարել «Դատապարտյալների հիվանդանոց», սակայն, ՔԿՀ-ի աշխատակիցները թույլ չտվեցին այն փոխանցել «Հաց բերողին»՝ ասելով, որ նա հացադուլի մեջ է: «Հայ կանանց ճակատի» ներկայացուցիչները «Ազատություն հաց բերողին», «Հաց բժիշկների համար», «Խղճի բանտարկյալ», «Մեր սերը հաց բերողին», «Դու պետք է ախրես», գրություններով պաստառներ էին տարել իրենց հետ:
Կանայք իրենց աջակցությունը հայտնեցին Արթուր Սարգսյանին եւ հորդորեցին նրան դադարեցնել արդեն 10 օր տեւած հացադուլը: Նրանք իրենց հետ տարած հացը տվեցին պատահական անցորդներին եւ մի քանի րոպե մնալով ՔԿՀ-ի դիմաց, ավարտեցին բողոքի ակցիան:
Հիշեցնենք, որ «Սասնա ծռեր» զինված խմբին օժանդակելու մեջ մեղադրվող Արթուր Սարգսյանն ազատ էր արձակվել 2016 թվականի դեկտեմբերի 31-ին, քանի որ ազատազրկման հետ անհամատեղելի հիվանդություն ուներ: Փետրվարի 9-ին, սակայն, նա կալանավորվել է: