Խորհրդարանում չհայտնվելը «Կոնգրես-ՀԺԿ» դաշինքի համար ողբերգություն չի լինի: Այս մասին, այսօր՝ փետրվարի 24-ին, լրագրողների հետ հանդիպման ժամանակ նշել է ՀԱԿ խմբակցության ղեկավար, «Կոնգրես-ՀԺԿ» դաշինքի ցուցակի 3-րդ հորիզոնականը զբաղեցնող Լեւոն Զուրաբյանը՝ չբացառելով, որ իրենց դաշինքը կարող է չհայտնվել ԱԺ-ում, սակայն կարող է նաեւ այնպիսի հաջողություն արձանագրել, որը բոլորին զարմացնի:
«Խորհրդարանում չհայտնվելը մեզ համար ողբերգություն չի լինի: Ես ունեմ շատ այլ հետաքրքրություններ, որոնցով կարող եմ զբաղվել այն դեպքում, եթե մենք չլինենք ապագա խորհրդարանում»,- նշեց Զուրաբյանը:
Անդրադառնալով հարցին, թե ինչո՞ւ չհաջողվեց ընտրություններից առաջ ստեղծել միասնական ընդդիմադիր բևեռ, Զուրաբյանը պատասխանեց. «Մարդիկ ընդդիմադիր բեւեռի ձեւավորման հետ հույսեր են կապում: Սովորաբար դաշինքները կազմվել են նախագահական ընտրություններից հետո մի ուժեղ ֆիգուրի շուրջ: Այս անգամ չկար ցեմենտը, որի շուրջ պիտի ստեղծվեր դաշինքը, բայց մենք համաձայնեցինք բանակցություններ անցկացնել դաշինքի ստեղծման շուրջ: Եկան, ասացին, թե եկեք ստեղծենք դաշինք: Մենք կասկածամտորեն էինք վերաբերում, տեսնում էինք, որ մի քիչ արհեստական է, բայց մեր համաձայնությունից հետո ստեղծվեցին այլ դաշինքներ, սեպարատորեն, ու պարզվեց, որ մեծ ընդդիմադիր կենտրոնի ստեղծումը հնարավոր չէ, եւ մենք որոշում ընդունեցինք ընտրություններին գնալ ՀԺԿ-ի հետ դաշինքով»:
ՀԱԿ խմբակցության ղեկավարի խոսքով, ձևավորված փոքր ընդդիմադիր դաշինքները չեն կարող կյանքի կոչել իրենց նպատակները, ինչը կարելի էր անել ընդդիմադիր դաշտի լայն կոնսոլիդացիայի պարագայում: