Արմավիրի մարզի Ամբերդ գյուղի տարեց ամուսինները փետրվարի 23-ին ավազակային հարձակման են ենթարկվել: NEWS.am-ի հետ զրույցում Ամբերդի համայնքապետ Մանվել Բաբայանը նշեց, որ ժամը 22։00-ի սահմանում 3 դիմակավորված անձ մտել են միայնակ ապրող տարեց ամուսինների տուն, նրանց կապել եւ գումար ու կոնյակ գողացել նրանց տնից:
Ըստ shamshyan.com-ի՝ դիմակավորված 3 անձանցից մեկը ատրճանակով զինված է եղել, նրանք մտնելով Ամբերդ գյուղի 14-րդ փողոցի թիվ 8 տուն կապել են 79-ամյա Ամալյա Եսայանին, որից հետո բռնություն կիրառելով՝ տան տարբեր սենյակներից հափշտակել են 200.000 դրամ, 700 ԱՄՆ դոլար, արծաթե 1 զույգ ականջօղ, ոսկյա 2 մատանի, բջջային հեռախոս եւ տարբեր տեսակի ալկոհոլային խմիչքներ։
Փաստի առթիվ Վաղարշապատի քննչական բաժնում ավազակային հարձակում հատկանիշներով հարուցվել է քրեական գործ։