Հայաստանի մարդու իրավունքների պաշտպան Արման Թաթոյանը որեւէ ճնշում չի զգում:
«Ներկայում որեւէ ճնշում չկա եւ, կարծում եմ, չի կարող լինել: Կարծում եմ՝ դա ապացուցված է նախորդ աշխատանքով եւ այսուհետ նույնպես կապացուցվի»,- փետրվարի 27-ին կայացած մամուլի ասուլիսում պատասխանելով Հայաստանի խորհրդարանական ընտրությունների համատեքստում ՄԻՊ գրասենյակի աշխատանքի մասին հարցին՝ հայտարարեց Արման Թաթոյանը:
Օմբուդսմենի խոսքով՝ առավելագույն արդյունավետություն ապահովելու համար 20 անձից բաղկացած աշխատանքային խումբ է ստեղծվել, որը բաժանվելու ենթախմբերի: Շուրջօրյա հերթապահություն է սահմանվելու:
Խմբին հանձնարարված է ուսումնասիրել բոլոր հրապարակումները, հանդիպել քաղաքացիների հետ, անհապաղ արձագանքել բոլոր ահազանգերին եւ հրապարակումներին, իսկ խմբի գործունեությունն օմբուդսմենի անձնական վերահսկողության տակ է լինելու:
Արման Թաթոյանն արդեն հանդիպել է ԵԱՀԿ/ԺՀՄԻԳ ներկայացուցիչների հետ, համատեղ աշխատանքի եւ տեղեկատվական կապերի պահպանման շուրջ համաձայնություն է ձեռք բերվել: Թաթոյանի խոսքով՝ ընտրական գործընթացի ժամանակ օմբուդսմենի գրասենյակն առավելագույնս թափանցիկ է աշխատելու:
