«Սասնա ծռեր» խմբին օժանդակելու մեջ մեղադրվող Արթուր Սարգսյանի` «Հաց բերողի» խափանման միջոցը փոխելու երաշխավորության տակ ստորագրել են 26 պատգամավոր: Այս մասին իր ֆեյսբուքյան էջում գրել է ԱԺ պատգամավոր Նիկոլ Փաշինյանը:
«Ստորագրահավաքին միացել են հետեւյալ պատգամավորները` Էդմոն Մարուքյան, Նիկոլ Փաշինյան, Զարուհի Փոստանջյան, Ռուբեն Հակոբյան, Ալեքսանդր Արզումանյան, Լյուդմիլա Սարգսյան, Հայկ Խաչատրյան, Նաիրա Զոհրաբյան, Լեւոն Զուրաբյան, Արամ Մանուկյան, Միքայել Մանուկյան, Միքայել Մելքումյան, Տիգրան Ներսիսյան, Լեւոն Դոխոլյան, Մհեր Շահգելդյան, Հեղինե Բիշարյան, Իշխան Խաչատրյան, Լյովա Խաչատրյան, Վահան Կարապետյան, Հրանտ Դավթյան, Մերուժան Սիմոնյան, Արմեն Ավետիսյան, Էլինար Վարդանյան, Ստեփան Մարգարյան, Վահե Հովհաննիսյան, Արայիկ Աղաբաբյան: Փաստաթուղթը քիչ անց կուղարկվի ՀՀ գլխավոր դատախազին»,- գրել է Նիկոլ Փաշինյանը:
Նշենք, որ Արթուր Սարգսյանի պաշտպաններն ավելի վաղ ահազանգել են, որ նրա վիճակը վատ է, չի կարողանում քայլել, արյուն է փսխում եւ ձայնը գրեթե լսելի չէ: ՀՀ ԱՆ ՔԿՎ հանրային կապերի բաժնից սակայն հերքում են եւ պնդում, որ Արթուր արյունային փսխումներ չի ունեցել, ձայնը լսելի է, խոսքը` հստակ եւ ունի սթափ գիտակցություն:
«Քրեակատարողական հիմնարկի համապատասխան մասնագետները եւս բազմիցս ներկայացրել են հացադուլի եւ բուժումից հրաժարվելու հետ կապված հնարավոր հետեւանքների նկարագիրը, սակայն Ա. Սարգսյանն անդրդվելի է»,- ասված է ՔԿՎ հանրային կապերի բաժնի տարածած հաղորդագրության մեջ: